Kanadier mached sich grad heftig loschtig öber d'Schwiizer. En Schwiizer esch ofem Highway met 161km/h verwötscht, erlaubt send nor 100km/h. Als Usred hed er am Polizischt verzellt, er segi so schnell gfahre, wells do in Kanada kei Geisse of de Stross hegi. Drom wird ich jetzt vo allne aghaue: "Hey Andreas, watch the goats!"

Originale News: http://news.bbc.co.uk/2/hi/americas/5322302.stm

De höttigi Blog-Itrag hed för eimol nüt met Kanada oder Toronto z'tue. Mer esch e brasilianischi Flash-Animation öber de Weg gloffe, wo eifach voll abrockt! :-)

Watch it!

Freitag, 1. September
Noch öppe 3h Schlof hämmer zmitzt ide Nacht müesse ufstoh ond send of de Flughafe gange. Nocheme chorze Flug semmer in New York La Guardia acho ond händ ois zerscht mol dor Stadt ond of Queens müesse doreschloh. Oisi Onderkonft esch Forrest Avenue in Queens binere Kollegin vom Suti gsi. Nochdem am Suti sine beide Koffere ond mis chliine Rocksäckli det abgstellt händ, semmer zomene Chines go Zmittag esse (normali Portionegrössi esch so gross, dass mers ned ufesse mag, ned mol de Suti) ond denn wiiter of Manhattan go sightseeing mache. Esch tip top gsi för mich, han mich om nüt müesse kömmere, bin eifach immer am Suti hindenoche glaufe. Mer send denn aber gliich es paar Mol im Züüg ome girrt. Han müesse feststelle, dass au di "Iheimische" chli Problem händ, sich z'orientiere :-) Min erste Iidrock: Die Stadt esch eifach RIESIG! Well de Wetterbricht för de Samstig ned so rosig usgseh hed, semmer am Obig no ofs Empire State Building ufe ond händ bi störmischem Wind Manhattan by night gnosse.


Samstag, 2. September
Am Samstig heds de ganzi Tag gschiffed ond drom händ mer es indoor Programm gmacht. Mer händ welle an Broadway gones Musical luege. Di offizielle Ticketpriise (di allerbilligsti Tickets ab $120) händ ois das aber ned so schmackhaft gmacht. Mer händs drom halt mol spontan am ticket booth versuecht. Ond siehe da: Well alli Musicals am 2pm afanged, werdet di letschte Plätz chorz vorem Start no mit Rabatt verchauft. So händ mer am 13:57 för $59 eis vode beschte Tickets förs Musical "The Producer" becho. Nocheme chorze Sprint send mer just in time im Theater acho. S'Musical esch rächt witzig gsi ond teilwiis no zemli abgange. Ich wörd mol bhaupte, es paar vode Szene, wo vo Nazis ond vom Hitler handled, chönnti mer ide Schwiiz/Europa ned ganz so zeige. Das wäri chli en heftigi Provokation.


Sonntag, 3. September
Am Sonntig Mittag send de Suti ond ich of de Pier 17 gange ond händ di wonderbari Uussicht of Brooklyn Bridge ond es paar Bier vonere lokale Chliibrauerei gnosse. Wetter hed weder uf to ond es esch wonderbar gsi. Aschlüssend semmer chli dor Soho gschlendered. Ein Lade nochem andere ond seeeehr vel Lüüt. Git glaubs nüt, womer det ned chan chaufe. Es hed zom Biispel en ganzi Stross, wos nor Fraue-Handtäsche-Läde hed, eine nochem andere. Kei ahnig, wie die öberläbet, das muess eifach en gewaltigi Chondschaft ha. Nocheme Bsuech bim UN Gebäde semmer weder of Queens zrogg ond met de Andrea (Suti's Kollegin) ond em George (Suti's ehemaligem room mate) ine bulgarischs-polnischi Beiz go abfäschte. No recht loschtig worde. I dem Teil vo Queens wo mer gsi send, esch total Osteuropa-Viertel. Det fendet mer nor Pole, Bulgare, Kroate etc.

Montag, 4. September
Nocheme Bsuech bim Flatiron Building semmer chli in Central Park go chille ond druf abe hani scho weder as Heigo müesse dänke. De Suti esch no es Stöckli met mer mitgfahre ond denn hämmer ois vonenand verabschiedet. Ich han denn nochli Cabaret gha. Be ned direkt of Toronto gfloge, sondern zerscht of Washington DC abe (esch gönstiger gsi). De Flüger of Washington hed zemli verspötig gha ond ich han oms Hoor de Aschlossflug of Toronto verpasst. Ben voll dor de Flughafe ond dor Sicherheitskontrolle grennt. Zerscht beni met Portmonee, Natel ond Gort dor de Metalldetektor. Hed nor so pfiffe ond de Security hed mi au chli apfiffe. Han denn aber kei Ziit meh gha zom de Gort weder alegge ond müesse renne, drom send mer d'Hose fast abeheit ond ich be wie en Pinguin omegwaschtled. Deför hani bim Start no en Blick ofs Pentagon chönne erhasche ond chan bhaupte, ich segi scho mol för 15 Minute in Washington gsi.

Die vier Täg im Big Apple esch e super Ziit gsi, woni mi secher no lang dra chan erinnere.

Die Woche beni halt ned so flissig gsi, met Blog-Iitrag schriibe. Ich be zemli busy gsi ond ha schlichtweg kei Ziit gha. Noch de Arbet beni immer met em Suti onderwägs gsi. Jawohl, de Dick esch acho ide Stadt. Ond er hed scho en heide Froid am "Carlos" (rechtige Name David) ond em Kari (rechtige Name Jukari). Ond natürlich hed er au scho s'Vergnüege gha, de Richy kennezlehre ond esch hell begeistered gsi vo ihm.

Morn gömmer of New York, am 4:30 dörfed mer am Flughafe si...juhuii!

Ben as indieUNLIMITED, es Indie Festival ade Harbourfront gange. Det hed onter anderem "The Hidden Camera", en kanadischi Indie Pop Band es Konzert geh. Super Sach gsi, ond zo allem ane au no gratis. Vo dene 3 kanadische Bands, wo ich scho kennt ha, bevor ich do here cho be (abgseh vo 0815 stuff wie Nickelback, Brian Adams etc.) hani fast alli gseh. Am Konzert vo "Russian Futurists" ond "The Hidden Cameras" beni gsi, nor "Immaculate Machine" hani verpasst. Die hätted eigentlich au e show in Toronto gha, aber do beni grad met de Natalie ide Ferie gsi.

Am Friitig Obig esch nomol chli Kultur ofem Programm gstande. Mer send is ROM (Royal Ontario Museum) gange. Esch aber ned so de Knöller gsi, obwohls eis vode grösste Museum in Nordamerika segi. Es chli onstrukturierts Sammelsurium vo alte asiatische Vase, ägyptische Mumie, griechische Torsos ond usgstopfte Tier. Nochdem mer ois nochli anderwiitig kulturell bildet händ (alles muessi im Blog jo ned schriibe, sost hani gar nüt me zom verzelle diheime) hämmer ois weder mol dröber ufgregt, dass mer nach 2:00 Uhr kei Bier meh öberchonnt (oder besser gseit, scho am 01:56 nömme). Mer händ denn es paar Lüüt of de Stross aghaue ond noch eine vo dene angeblich illegale Bars gfroged, womer ebe no Alkohol bechonnt. Zwor händ alli gwösst, dass es das git ond au scho devo ghört, aber natürlich niemert gwösst wo.

Das esch jetzt wörkli en Öberraschig gsi. De Steve flüügt morn hei nach England ond drom semmer mit ihm es letschts Bier go trenke. Ich han mich nochher denn of de Heiweg gmacht ond ben in Streetcar igstege. Wo ich so in Streetcar iistiige ond langsam in hindere Teil vom Wage laufe, gsehn ich, wie öppert det hocket ond mich so komisch alueged. Es esch sone rechtig typischi Situation gsi. Zerscht hani dänkt, die kenn ich doch, denn weder, nei, ich tüsche mich. Ond ehre esch es gnau gliich gange. Ich be denn a ihrem Platz verbi gloffe, mer lueged ois beidi a, sie seid: "Häää?" Ich säge: "Ich glaub, ich spinne." Sie seid: "Was machsch denn du do?" Es esch Cindy Brunner vo Zorzi gsi. Sie hed in Toronto e Sprochschuel gmacht, goht aber morn id Ferie of Montréal ond Québec. Ond nebebii hani au no erfahre, dass sie in Oberehredinge als Lehrerin schaffed ond mini Schwöster, d'Pa kennt. Jawohl, Welt esch mängisch scho chli.

Am Mittwoch esch wie üblich oisi Pub Night ond ich hans weder mol gschafft, di letschti Subway z'verpasse. Welli de Streetcar au no verpasst han, heds chli en längere Heiweg geh. Daför hani folgendes Schild vor ehre Chile gfonde:

Alli Lüüt wo im BCE Place schaffed händ höt Mittag es gratis Mittagesse (entspricht eme Hamburger oder Hot Dog) becho. Das esch denn en zemliche Masseuflauf gsi. Wenn mer nor mol dänkt, dass beidi Towers 51 resp. 47 Stockwerk händ ond i jedem Stockwerk so ca. 200 Persone schaffed, denn send das scho mal 10'000 - 20'000 Lüüt gsi. Es hed e Warteschlange oms ganze Gebäude gha, esch aber dank 6 Fassstrosse no erstuunlich schnell vorwärts gange. Burger send met Hochdrock grilliert worde, so vel, dass de einti Grill vor luuter herablaufendem Fett afo brenne hed onds de met eme Füürlöscher händ müesse lösche.

Freitag, 18.08.2006
Noch de Arbet esch es losgange. Mer (Christiane, Moritz, Leo und ich) händ oises Auto abgholt, Grill, Zelt ond Chüelbox ufglade ond ois of de Weg in Sturgeon Bay Provincial Park gmacht. Das esch en Park, ca. 260km nördlich vo Toronto (also nor en Chatzesprong). Ohni grösseri Problem det acho, hämmer ois zerscht mol ofem Zeltplatz verfahre. Hed es wiili duured, bes mer oisi campsite gfonde händ. Ofem Zeltplatz hämmer denn au de Roderik troffe, wo direkt us Sudbury cho esch.



Samstag, 19.08.2006
Nochere Nacht met Bsuech vo mehrere Waschbäre hämmer am Samstig es Motorboot gmieted ond send chli ofem Georgian Bay (eine vo dene grosse See in Nordamerika) met sine 30'000 Inseli omegfahre. Eigentlich hämmer welle met em Kanu omepaddle, doch die send scho alli uusbueched gsi. Doch im Nachhinein gseh, esch Motorboot di besseri Wahl gsi. Mer send so chli wiiter im Züüg omenand cho ond händ honderti vo Cottages chönne bewondere. Es get glaubs kein Egge ond keis Inseli, wo ned es Cottage droffe stoht. Met em Navigiere im seichte Wasser hämmer mängmol au chli müeh gha. Hed denn halt es paar Kollisione mit Felse geh. Am Obig hed min Grill nomol alles geh ond mer händ es uusfüehrlichs Barbecue gha. Ide Nacht semmer denn vo es paar Regetropfe öberrascht worde. Aber mis 29-Dollar-Wal-Mart-Zelt hed sini Taufi bestande, Wasserdicht wie en schwiizer Marke-Armbanduhr!



Sonntag, 20.08.2006
Nocheme feine Früehstöck (alli Toastbroot händ noch Burger ond grilltem Fleisch gschmöckt, well de Grill soooo voll Fett gsi esch) semmer met em Auto es Stöckli gfahre ond ime verlassene chliine Hafe chli go bade. Gäge de Obig hämmer de Roderik verabschedet ond ois weder rechtig

Ich han neuerdings mis eigene Business, zomindest pro forma. Ben Manager vonere Bar met em Name "Fresh Inc. Juice Bar". Wieso das? De Steve esch mittlerwiile weder zrogg of Australie ond wott näbem Studium Teilziit imene Falafel-Restaurant schaffe. För Bewerbig hed er no es paar Referenze bruucht. Ond well er no nie im Gastgwerb gschaffed hed, hed er halt es paar Referenze erfonde, wo er während sim Toronto Ufenthalt gschaffed hed. Ich warte jetzt jede Moment ofs Telefon us Australie, wo sich noch mim ehemalige Mitarbeiter erkondiged. En schöne Saft hämmer do zämegmixt! :-)

Höt hani di letschti Englisch-Lektion gha ond d'Schwiiz kulinarisch met eme Toblerone Schoggi-Mousse repräsentiert ... guet, gäll?!?

Im Röckblick gseh hani ned s'Gfüühl, dassi wahnsinnig vell Nois glehrt han. Halt so chli en Uffröscher vo scho lang weder Vergässnigem. Immerhin send mini Englisch-Kenntnis jetzt officially pimped by George Brown College ... pffft. Aber hed sich gliich glohnt, Lüüt woni det kenneglehrt ha send vo de ganze Welt cho(Äthopie, Brasilie, Kasachstan, Mexiko, Afghanistan, Kuba, Argentinie, ...) ond das esch ganz interessant gsi.

In Toronto gits öberall di sogennante bike ring and posts. Das esch sonen Metallpfoste, womer s'Velo dra abgschlüsse cha. In ganz Toronto gits anschiinend 16000 vo dene Pföste. De folgendi Velofahrer heds System vo dem glaubs aber ned ganz begriffe...

Wenn ich amigs gfroged werde, woher ich chome, denn frog ich immer zrogg: "What do you think?" Ond höt esch mer scho zom dritte Mol passiert, dass eine gseit hed "Spain". Anschiinend gsehn ich meh wie en Spanier us als wie en Schwiizer? Sie händ immer s'Gfüühl Schwiizer müessed blondi Hoor ha.

Vollwaschmittel gits in Kanada ned. Drom gseht di wiisi Wösch nochem Wäesche au ned wiiss, sondern meh so schmodelig dreckig us. Bleichmittel muess vo Hand dezue gschötted werde. Han mich höt leider i de Konzentration vertoh: Mini hellbrune Hose händ chli en Farbveränderig duregmacht ... hoppla!

Ben höt Obig met de Chrissi ond em Leo am "Taste of Danforth" gsi, es Festival in Greek Town. Ond öppe scho zom 10. Mol hani di letschti Subway verpasst. Ich weiss ned, was ich falsch mache, aber ich luege immer zue, wie di letschti Subway abfahrt ond ben am warte, bes denn mol eine chonnt ond seit: "No more trains tonight." Ond denn heisst amigs z'Fuess heilaufe. Aber ehrlich gseit, macht mer das gar ned so vel us. Ich gnüsses fangs. Met eme Hot Dog seeleruehig Yonge Street (di längsti Stross vo de Welt, startet in Toronto ond goht dor ganz Kanada) derab bis zo de College Street. Mängsmol trifft mer sogar "Kollege" a, z.B. höt de George, wo mer sini halbi Läbesgschecht verzellt hed.

Zom weder mol so rechtig z'Schlemme send mer Ustuschstudente ines koreanisches Restaurant gange ond händ es all you can eat Tischgrill-Menu gha. Ond de Gspass choschted nor $13! Das esch ohni ergendwelche mageföllendi ond öberflössige Biilage, nor purs Fleisch ond Fisch! Hmmmm ... guet gsi!

Noch dere Völlerei hämmers met Clubbing probiert. Es esch jo ned eso, dass in Europa Musig ide Clubs immer 1A wäri, aber do spelleds de ganzi Obig nor so RnB ... ächzg! Ond am 02:00am werd mer usem Club "usegrüehrt". Es werd kei Alkohol meh usgschänkt, was zor Folg hed, dass alli Lüüt heigönd.

Han höt im Englisch-Kors de Abschlusstest gha. So rechtig en Ami-Test mit achrüzle ond Löcke usfölle. Sälber schriibe muess mer fascht nie.

De Roger Federer esch im Roger's Cup in Toronto dick dinne. Ich glaube, de Roger esch so zemli de bekanntischti Schwiizer do enne. De kenned alli ond send begeistered vo ihm.

Alli Terror-Warnlampe stönd jo weder mol of donkelrot ond di patriotische Fernsehsender zeiged met Musig ontermalti Statements vom El Presidente. Börse-Kommentatore im Fernseh roted eim, Aktie us Länder met gringerem Terrorrisiko wie Schwiiz oder China z'chaufe. ABB werd grad zom Chauf empfohle, Infrastruktur-Aktie segged weder in.