Am Fritig Obig händ mer IAESTE Studis beschlosse, am Sonntig ad Niagara Fäll z'fahre ond händ do dezue es Auto gmietet. Auto miete do in Kanada esch eigentlich no zemli bellig. Hed nor ein Hogge: Mer muess immer no Versicherig abschlüsse (resp. mer muess ned, aber es wird dringenst empfohle) ond die Versicherig chosted mängsmol meh als Automieti sälber.
Am Samstig heds voll gschöttet, drom hani ned gross veruse welle ond ben de ganzi Tag chli met de Schwiiz am omeskype gsi. Ben jetzt weder voll ofem neuste Stand, was back home so abgoht. Ich säge nor "Bahnhofbuffet Olte" ;-)
Am Samstig Obig send mer IAESTE Studis denn in Usgang. Imene Pub heds denn met so Englische Gentlemen Trinkregle agfange. Je noch Ziit muess mer Bierglas met ere andere Hand heb, Flueche esch strengstens verbote ond mer dörf nie met em Finger of öppert zeige. Esch sauglatt gsi. Weniger loschtig esch denn di aschlüssendi Clubbing Tour gsi. Send i somene 08:15 Club met $10 Itrett ond schlächter Musig glandet. Einzige Highlight esch gsi, das am Engländer (wem au sost?) Bierfläsche abegheit ond kaputtgange esch. 10 Sekonde spöter stoht en Security näbe mer ond macht mich chli onfröndlich a. Nochdem ich ihm denn han chönne klarmache, dass es ned mini Fläsche gsi esch ond dass es paar Glasscherbe ofem Bode jo ned so schlimm seged, hed er de Onfallort grossrüümig abgsperrt ond alli Scherbe ufgruumed. Jaja ... safety hed do höchsti Priorität.
A propos safety ... gester hed Polizei imene Vorort vo Toronto 17 angeblichi Terroriste verhaftet. Sie händ 3 Tonne Ammoniumnitrat (Dünger wo als Sprengstoff missbrucht werde cha) ond Zündervorrichtige gha ond welle en Bombe baue. Zor Ziit werd öber s'mögliche Attentatsziel spekuliert. Gnennt worde esch de CN Tower, U-Bahn oder Gebäude vom kanadische Gheimdienst. Ehrlich gseit han ich mich bis jetzt gwonderet, wiesos ned meh Polizei ide U-Bahn hed, schliesslich esch s'kanadische Militär au in Afghanistan involviert. Vellecht änderet das jetzt jo bald?!?
Aber zrogg zo oisem Usgang vom Samstig. Es esch denn zemli spot worde, ond mer händ am Sonntig Morge am 8:15 abgmacht gha. Noch 3h Schlof beni denn ufgstande ond an abgmachte Treffponkt gange. 2 send scho gar ned erschene ond die andere beide (inkl. ich) händ au ned besser usgseh ... ond Wetter esch au ned so guet gsi (jaja ... mer händ au no en gueti Usred gfonde) ... Trip noch Niagara esch jetzt of onbestimmti Ziit verschobe worde.
