Nochträglich do oisi Erläbnis vode letschte 2 Woche. Halt chli vel zom Lese ... aber mer händ halt au vel erläbt!
Nochdem mer gester Obig scho en Parkbuess becho händ ond mer ned ganz secher gsi send, öb oise Parkplatz wörkli legal esch, ben ich met eme schlechte Gfüühl verwached. Gschnell es paar Hose agleit ond no völlig schloftronke zom Auto gschlurft ... ond prompt, scho weder es parking ticket. Parkiere am Strosserand esch doch ned sone gueti Idee. Ond zo allem Öbel esch au grad no en Cop ime Polizeiauto zfahre cho ond hed hender oisem Auto aghalte. Ich glaube, es wäri nömme lang gange ond oise car wäri abgschleppt gsi. Nochdem ich denn no oisi Stegge derabgflogge be ond met em Chopf ad Steggedecki täscht be, beni denn definitiv wach ond ready för oise roadtrip gsi.
Imene "regebogefarbige" Lokal hämmer es typisches English breakfast gno. Natalie esch stets met "sweety" agsproche ond d'Eier send vomene kichernde und gackernde Moskelprotz serviert worde. Aber Zmorge esch de Hammer gsi!
Mer send denn rechtig Norde gfahre. De Algonquin Nationalpark wäri eigentlich oises Ettapeziel gsi, wenn mer do ned weder bi somene Wal-Mart verbi cho wäred. Eifach es Shopping Paradies för Natalie ond de Andreas. Pfanne för $5, Flauschi Decki met Chössi för $7 ond hiking Schueh för $19!! Mer händ so lang poschted, dass mer oises Iichaufswägeli nömme gfonde händ. Wal-Mart Frau heds scho versorged gha, well mers z'lang omestoh loh händ.
Noch echli falsch fahre (im Chreis ome ... ah ... do fohre semmer doch go poschte gsi oder?) semmer denn ofeme Zeltplatz glandet ond händ oisi super Zeltusröstig grad Mol of Herz ond Niere tested. Ond ich ben schomol fascht doredrölled ab dene Moskitos ond black flies. Black flies händ mich hinder em Ohr so fescht besse, dass Bluet abegloffe esch. Das send rechtigi Dracula Fiecher!
Bim Znacht esse esch denn es wiiters Malheur passiert. Mer sett ebe ned ofeme Camping-Holztisch-met-Bank omekösse. Gwechtsverlagerig chli ongschickt gsi. Tisch ond Bank esch kipped ond alles öber ois ine gheit. Grill mer of de Chopf (weder Mol), Pfanne met Tomatesauce ond de Wii de Natalie öber d'Hose, doregnässt bes of d'Onderwösch. Oisi Chleider händ am nöchste Morge so rechtig noch Essig gstonke (Wii esch ebe ned de beschti gsi).
