Es esch chum z'glaube aber wahr: Toronto hed kei Kehrichtverbrennigsalag! Alle Abfall (3.5 Millione Tonne pro Johr) werd id USA of Michigan verschifft ond det ine alti Mine ine gschmesse. Ond Sackgebühre oder so kennt mer natürlich ned, drom werd au alles mögliche weggrüehrt.
Es hed öber das donkle Abfallkapitel sogar scho mol en Simpson-Folg geh ("Trash of the Titans") wo de Homer de Börgermeister vo Toronto parodiert.

P.S: Wassermann ned cho, Wasser immer no chalt, aber bi 36°C esch das ned so schlimm.

Ich ben michs jo scho fascht gwöhnt, weder mol hani kei warm Wasser. De Boiler ide WG hed afange rönne. Es hed ide ganze Chochi en See geh ond de Dave hed müesse de Hahne zuedreihe. Drom heds kei warm Wasser ond de Wassermaa wott de Boiler erst am Mäntig cho flecke cho.


Höt Nomittag beni of Little India gange ond das esch en gueti Entscheidig gsi. Hed det loschtigi Läde met tuusige vo goldige ond andere Ganesh-Figure ond Pfanne das es nor so chlöpft ond tätscht. Mer fendet au Chleiderläde met knalligbonte Indie-Chleider, Juwelierläde met goldigem bling bling ond natürlich au DVD stores met em volle Bollywood Sortiment. Ich fendes no interessant, de Vergliich zwösche China-Town und Little India z'gseh. Ergendwie esch in Little India alles chli süberer ond ordentlicher. Chinese send eher Chaote ond Omenand-Schreiiis. Es Restaurant in China-Town zom Bispel esch hässlicher als jede SBB Wartsaal ond Bedienig zemli onfröndlich (jedefalls Gägenöber eme caucasian). Es indisches Restaurant hingege esch schön met wiissem Tischtuech deckt ond de Chellner össerst korrekt ond fröndlich.

Jazz Festival at the Beaches esch ofem Programm gstande ond ich be met de anderne IAESTE Studis det here gange. Bandbreiti vode Musig esch zwor einiges breiter als Jazz gsi, doch sost esch es sim Image als Strassefestival grächt worde. Bands händ wörkli of de Stross gspellt, Rond ome Band hed sich denn jewiils spontan en Menscheasammlig bildet.

Oisere europäische Uffassig (1 x Norwegen, 2 x Finnland, 1 x Deutschland, 1 x Österreich, 1 x Griechenland, 2 x UK, 1 x Spanien, 1 x Schweiz) gemäss händ mer denn au es paar Bier kauft ond die ofem Festivalgländ tronke. Das hed denn aber zome chlinere Zwöschefall met de kanadische Polizei gfüehrt, wo ois onder Adrohig vo $120 Buess Bier weggnoh hed. Mer händ denn ois chli tomm gstellt ond gseit, mer säged Europäer ond heged ned gwösst, dass Alkohol-Konsum ide Öffentlichkeit verbote segi (ide Gartewirtschaft vom Restaurant dörf mer trinke, mer send 10m näbe dra gstande). Cops händ recht schwerig to ond send alles anderi als fröndlich gsi. Jedefalls esch es denn binere Verwarnig blibbe, Buess hämmer keini müesse zahle.

Ben endlich weder mol go jogge gange ond han debi usegfonde, dass sich Jogger in Kanada immer grüessed. Jede Jogger(in) wo mer entgegecho esch, hed met de Hand gwonke ... fröndlich fröndlich.

Han ide Wohnig en Fernseh ide Chochi ... fendi sehr praktisch, chani immer chli Fernseh gugge bim Choche. Min Lieblingssender esch de cartoon channel ond de absoluti Knöller esch "Family Guy". Eigentlich ähnlich wie Simpson, aber besser!! Vor allem s'Baby esch de Hammer wo sonen typische britische Akzent hed ond voll de Engländer spellt. A propos Fernseh: Bi Rogers (Kabelfernseh Firma à la Cablecom, mit gliich schlächtem Chondeservice) chan mer es Personal TV Package met 751(!) verschedene Sender ha.

So vel weniger als ide Schwiiz han ich för en Herre-Hoorschnitt zahlt. Ben öber d'Brogg nach China Town öbere gloffe ond in erste barber shop, wo gross gstande esch: haircut $6. Det hani denn zerscht mol müesse ofs Wartebänkli hocke. Met Heftli läse esch nüt gsi, die hani ned verstande, also hani halt di andere Lüüt beobachted ond chli es onguets Gfüül becho. De Coiffeur ond de Chond vor mer händ nämli beidi en kahlgschorene Chopf gha. Met sonere Standard-08-15-Kommuniste-Frisur wott ich ned usem Lade laufe!! Han also de Coiffeuse igschärft: Not toooo short, please! Kei Ahnig, was die bim Hoorschniide di ganz Ziit gschnäddered hed, abrakadabrisch gsi. Met em Resultat beni einigermasse zfrede ... för 6 Dollar ganz respektabel.

S'Wochenendi hämmer wie scho aköndiged am WEMF (World Electronic Music Festival) in Tweed (zwösche Toronto ond Ottawa) verbrocht. Festival esch okay gsi, chli anderst als es Openair ide Schwiiz. Mich hed z.B. mega gstört, dass öberall met em Auto hesch chönne herefahre. Es hed glaubs meh Auto als Zelt ofem Festivalgländ gha. Teilwiis sends grad met Lieferigswäge cho, belade mit Generatore, Sofas ond Gasgrill.


Es hed 6 Bühnis gha, aber alli eher chli. Bruuchbar esch nor Rock-Bühni ond DnB-Bühni gsi (för de Simon: Goldie, Krust, Grooverider, ...). Die andere stages send mer chli zu fest Techno-mässig gsi.

Noch 2h Schlof send mer am Morge am 7ni weder of de Shuttle-Bus. Resultat: Ich ben total kapott, Tinitus pfiift immer no, 3h ime gäle Schuelbus esch Horror, Schlofe nor met gröbere Verrenkige ond aschlüssendem Muskelkater möglich.

Baseball esch höt agseit gsi bi ois Studis. New York Yankees händ gäge Toronto Blue Jays gspellt. Ond vo Baseball han ich bes jetzt öberhaupt kei Ahnig gha. Doch zom Glöck han ich am Spiel de Andi kenneglehrt, en rechtige Kanadier, wo mer s'ganze Spel met allne Regle erklärt hed. Ich glaube, ohni das wäris zemli langwiilig gsi. Ond de Andi esch wörkli en Baseball-Fan gsi. Er esch met sinere family nämli extra vo Tweed of Toronto gfahre (en Chatzesprong, nomme 230km entfernt). Ond zuefälligerwiis gönd de Steve (Australier), de Steve (Engländer) ond ich morn of Tweed as WEMF (World Electronic Festival). De Andi hed ois bereits abotte, dass mer bi ihm chönnd öbernachte, falls es cho regne chonnt. Also onkompliziert sends, die Kanadier!


Baseball im Rogers Centre, mit öffenem Schiebedach.

Han grad es sehr menschlichs Problem gha ... ich hett mol müesse go Wasser loh, aber in Toronto heds eifach vel zwenig öffentlichi WC!!! Beni met de U-Bahn onderwägs gsi. Ide U-Bahn sälber natürlich nüt dergliche ond ide Statione au ned. Also beni ine 24h Mall gange, doch det heds vor em Herre ond Dame-WC es Schild mit "Closed for Service" gha. Also wiitergsuecht ... Bäum gits leider au ned so vel ... ond anen Huusegge esch ned so zivilisiert ond öberall werd mer beobachted ... also hani de Streetcar noch hei gschnapped ... doch wie's immer esch, wenn mers mol pressant hed ... öberall esch es rot ... ewigs gange, mindestens doppled solang als normal. Ond es hed afo weh tue, die letschte paar Meter zode Huustöre hani müesse renne. Puuuh ... ihr glaubed ned, was es för en Erliechterig gsi esch.

Han im Englisch-Kors öppis öber d'Herkunft vom Wort "Dollar" glehrt. Im böhmische Joachimsthal heds for langer langer Ziit en Silbermine geh, wo als Hauptproduktionsstätte för Geldmönze dient hed. Also hed mer das Geld als "Joachimstaler" oder chorz "Taler" betitled. Ond dorch veramerikanisierti Ussproch esch das ganze denn zo "Dollar" worde. Jawohl, sovel zor hötige Gschichtsstond!

De Stromverbruch in Ontario hed höt en Rekordwert erreicht. Wieso? Well alli ehri air condition of vollpower gstellt händ.

Ond wössed ihr, was s'meischtgstohlnige Produkt i kanadische Supermärkt esch? Nei, ned Rasierklinge oder Alkohol, sondern Chäääs!! Keis Wonder bi dene öberressene Priise (Bsp: 1 Pack Parmesan för $7). De Milchpriis werd vom Staat festgsetzt ond esch sett 1994 om 49% ufegange. Gemäss ere OECD Studie send Milchpriise in Kanada 2-3 Mol höcher als de Weltmarktpriis.

Met allne IAESTE Studente hämmer höt en Usflug noch Niagara gmacht. Tour esch met eim vo dene gelbe Schuelbus gsi, also zemli onkonfortabel send die. Do tuet eim de Hinter noch ere Stond hocke zemli weh ond Beifreiheit hed mer nor seeehr begrenzt. Öppe so gmüetlich, wie en Duro-Fahrt.

Zerscht semmer ine Winery ond händ kanadische Wii öbercho. De Iiiswii esch ganz guet gsi, zemli süess. Kanada esch de weltgrössti Exporteur vo Iiiswii ond de grössti Abnehmermarkt esch ned öppe Europa, sondern Asie. Ond onglaublch tüür esch er. Fläsche zo $65.--, do hämmer nochem gratis Probiererli doch lieber d'Händ devo loh.



Noch de Winery esch es denn wiiter zode Niagara-Fäll gange, womer en Bootstour (the world famous "Maid of the Mist") gmacht händ. Alli Touriste händ schön brav die blaue Regemänteli agleit, zom joh ned nass werde. Ich han mich gweigered, well es esch 38° heiss gsi. Do esch mer en nass-feuchti Abchüelig grad rächt cho. Mer händ denn met em Schuelbüssli au no en Abstecher zom Whirl-Pool (weltgrössti natürlichi Whirlpool, aber zemli en Entüüschig) ond nach Niagara-on-The-Lake (no en schöni chliini Gartestadt) gmacht.

Höt händ de Domink ond Claudia ghüroted ond drom ben ich jetzt offiziell Schwoger worde! Han drom met de Webcam en Live-Schaltig id Schwiiz gmacht, ich hoffe, es esch det guet acho.

Noch de Webcam Schaltig beni met em Steve as Barbecue vom Don gange. No ganz gemütlich gsi det. De Don hed ois voller Stolz sini "Stereo" met de 3 Röhreverstärker (met total 17 Röhre) demonstriert.

Höt hani es Erläbnis gha, wo glaubs typisch kanadisch esch. Chan mer amol ned vorstelle, dass das ide Schwiiz passiere wördi.

Woni for 2 Woche met em Steve (Australier) am Cat Empire Konzert gsi ben, semmer met 2 Ladies is Gspröch cho. Die händ ois nochem Konzert gfroged, öb mer no met ihne ine Bar es Bier chömed go trinke. I dere Bar esch denn e ganzi Gruppe gsi, mer händ niemert kennt, aber halt chli met allne gschnorred. En chli atronkne Herr, wo die ganz Ziit am omeplagiere gsi esch, hed sich ois denn als daddy vo dene two ladies vorgstellt (so voller Stolz: "These are my daughters"). Er selber esch au am Cat Empire Konzert gsi, heds au super gfonde ond sowieso, er hegi di beschti Stereoalag diheime, die segi besser als jedi Livemusik ... wrääh ... wrääh. Zom Schloss hed er no gmeint, mer selled ihm oisi Telefonnommere geh ond er wördi denn mol es Barbecue organisiere. Mer händ dem Schnorri-Cheib natürlich nüt glaubt. Doch höt im Büro hani es Telefon becho: "Hi Andreas, this is Don (sin Name hani vorher ned kennt) ... you know, the guy from the Cat Empire concert. We gonna have a BBQ next Saturday ... are you in?". Jawohl, jetzt send de Steve ond ich zome rechtige kanadische BBQ iiglade.

U-Bahn Statione in Toronto send alli so ime 60er oder 70er Johr Baustil. Alli Wänd send plättled, teilwiis met zemli kuriose Farbe ond Forme. Doch das ganze hed au ergendwie Stil, die Plättli send scho fascht Kult.


Spadina Station
P.S.: Es esch halt nüt spannends passiert, drom gits ab jetzt immer es U-Bahn-Station-Föteli, wenns en langwiilige Tag gsi esch. :-)

Ein Liter Benzin chosted in Toronto zwösche 96 bes max. 104 cent, also Fr. 1.05 bes Fr. 1.13. Doch es beklaged sich do alli, dass Benzin so tüür segi. I es paar kanadische Provinze (Québec, New Brunswick, P.E.I) esch de Benzinpriis staatlich reguliert ond es paar Politiker in Ontario fordered das jetzt au. Sie erhoffed sich do dervo en stabilere ond fairere Priis. De Staat schriibt alli 2 Woche vor, was de Priis esch, Tankstelle müends denn zo dem Priis verchaufe. Do gseht mer, wie wechtig de Benzinpriis för d'Amerikaner esch. Ich hoffe, er goht nochli ufe!

Ich han min Grill packt ond denn send (fast) alli IAESTE Studis zum Leo hei (au en IAESTE Studi us Griecheland) ond händ de Match glueged. Nochem Match hani de Grill igheizt worde ond es hed fein afo schmöcke ... ond well ich am meischte exponiert gsi be, schmöcki ich ond mini Chappe jetzt no nach me barbecue. Aber min $21.63 Grill hed sich beschtens ghalte! Muess de glaub wörkli no id Schwiiz exportiere.

Mer hed am Sonntig weder mol gmerkt, dass Toronto "the most multicultural city in the world" esch. In Little Italy esch voll Post abgange. Mer gseht do fascht meh Italie-Fahne als bi ois ide Schwiiz amigs.

Mer (Moritz, Risto, Lara) send gester Obig am "Flight of Fancy" gsi. Das esch chli es usgfallnigs Event gsi, wo folgendermasse funktioniert hed:
Per Internet esch en Treffpunkt und en Ziit bekannt geh worde, plus de Hiwiis, mer sell sich möglichst schräg alegge. Wie de Event verlaufe wird, esch denn chli en Sach vom Zuefall.

Also zerscht no schnell in 1-Dollar-Shop und in Goodwill för $8 chli Ramsch ond Secondhand-Chleider zämechaufe ond ab zom Treffponkt. Es send mindestens öppe 100 Lüüt det erschine: Aliens, Feen, Ninjas, Saxophoniste, Trompeter, e Trömmeliband, ond ond ond. So esch es denn losgange. Zerscht händ sich alli ine U-Bahn inequetscht, niemert hed gwösst wohere.


Ade Union Station acho hed denn mol eine gschroue, dass alli usstiige selled. Das ganze hed sich denn zonere Parade dor Stadt entwickled. Teilwiis met kritische Blick vo Passante, wo d'Welt nömm verstande händ, teilwiis aber au mit Zuejublerei. Plötzlich hed sich Mengi amigs weder irgendwo gsammled ond es händ sich spontani Aktione wie Füürwerk, Jongliere ond Fackelperformance ergeh. Ond die Type wo als Ninjas verchleidet gsi send, händ also alles geh, wild omegrennt, Heubörzel gmacht, of jedi Statue ond sogar uf Strasselampe ufeklettered. Das ganze hed denn ime Park am Beach geendet. Well niemert vo ois Znacht gesse gha hed ond mer alli fast am verhongere gsi send, semmer denn zrogg id Stadt gange zom no öppis go habbere.

Mis ACACS (Air Condition Acquired Cough Syndrome) esch schlimmer als beförchtet. Ben di ganz Ziit am omehueste, Hals esch ei Chratzwüesti....grrr.

Nüt bsondrigs passiert höt ... sorry ... normale Arbetstag halt.

David (Mitbewohner) hed mer höt verzellt, dass er bes Chorz vorem 9/11 ide Parkgarage vom World Trade Center gschaffed hed (illegal) ond immer no es Ticket för of de Torm ufe hed. Tja, do chamer wohl vo Glöck rede.

Nocheme Zmorge för 3.99 (wahlwiis au met eme Steak erhältlich, doch för das esch min Mage wörkli noni bereit gsi) hani welle ines Aquarium go. Hed det aber öppe en 100m langi Schlange vo Lüüt voredra gha (ned öbertrebe!). Han jedefalls scho gar ned versuecht, azstoh. Ben sost halt nochli dor Stadt gschlendered ond dies ond jenes aglueged. Ond en Extra-Rondi met em "El" hani au nomol gmacht, well de Zug hed mer sooo gfalle! :-)

Send drüü interessanti ond asträngendi Täg gsi in Chicago. Kei Ahnig wie vel Kilometer ich gloffe ben ... Sohle vo mine Finkli esch jedefalls doregstiffled. Ah ja ... trotz öber 30 Grad verosse han ich mer no en Verchältig gholt ... dank amerikanische Klimaalaage.

Es paar Klischees öber USA send mer in Chicago scho bestätigt worde. Alles esch nomol en Nommere grösser als in Kanada: Autos, Hüüser, Portione ond dementsprechend au d'Lüüt dicker. In Toronto gseht mer ned so vel dicki Lüüt. Folgendes esch nämli passiert: En Frau esch nebe mer vom Stuehl abe gfloge. Ned wells ehre schlecht gange wäri, nei, sondern well de Stuehl halt för en Normalsterbliche konzipiert worde esch ond ned för ehres Körpervolume. Die gueti Frau hed natürlich ned us eigne Chräft chönne ufstoh, also han ich ehre welle helfe. Vergebens ... ich han sie au ned möge ufzieh. Also esch denn no en zwoite Maa cho ond z'zwoite hämmer sie denn weder of ehri Bei brocht.

Zor Ziit esch in Chicago grad es Festival "Taste of Chicago". Das werd als multikulturelles Festival betitled, womer alli "foods of the world" probiere chan. In Wörklichkeit esch es denn eifach di ver-amerikanisierti Version vo world food. Alles esch fritiert, vo Öpfelstöckli, öber Shrimps, Lobster ond Turkey Leggs. Hauptsach fettig. Aber en Abstecher esch es allemal Wert gsi.

Han det au en Rekrutierigsstand vode US Army gseh. Onglaublich, wie die Army aapriised. Am Stand lauft keine(!) met Tarnchleider ome, schliesslich sell nüt anen Kampf erinnere. Devör wird en Hummer mit riesige Luutsprecher ond vier Verstärker heregstellt, loht chli Gangsta Hip Hop laufe ond zieht drom allerhand Gesindel a. Ond denn gits no en Klimmzug Wettbewerb, wo jede muess bewiise, dass er sini Üebige im Fitness-Studio gmacht hed. Army wird vollkomme als en Lifestyle vermarktet ... wer id Army goht, esch cool ond so ... hauptsach niemert dänkt dra, dass mer evtl. au in Irak ond in Chrieg muess. Falls wörkli öppert interessiert esch: http://www.goarmy.com


Army hed sogar en gschötzte Markename: "An Army Of One^®"

Mer sett nie z'lang in Usgang ond Bier trinke, wenn mer am nöchste Tag am 6i am Flughafe sii sett. De Wecker hani im Halbschlof wohrschendli nomol abgstellt. Kei Ahnig wieso, aber plötzlich beni met em Gfüül "Scheisse, min Flüüger" ufgwacht ond wie de Blitz usem Bett ond no schnell die letschte Paar Sache in Rocksack packt ond nochem nöchstbeschte Taxi gschroue. Glöcklicherwiis beni denn no rechtziitig acho ond ha de Flüger verwötscht.

Wassi au ganz schräg gfonde ha, esch, dass mer bereits in Toronto dor de US Zoll muess, inkl. Fingerabdrock ond Foti ond ond ond. Ich verstohne ned, wieso das Kanadier zuelönd. Mer chönnt mängisch wörkli meine, Kanada segi en Staat vode USA (das ghöreds nämli gar ned gern).


In Chicago acho hani zerscht grad mol en Tour met em "El" gmacht. Das esch an Art Subway, wo aber öber de Strosse verlauft, ca. of Höchi vom 1. oder 2. Stockwerk. Ond das esch eigentlich au vel besser als en Subway, mer gseht so näli vell meh vode Stadt.


De "El" oder chorz "L", was vo "elevated" abstammt
Aschlüüssend beni of de Sears Tower ufe. Das esch bes vor es paar Johr s'höchste Gebäde of de Welt gsi (de CN Tower esch zwor höcher, aber ebe nor en Antennetorm ond keis richtigs Gebäde). Hauptsach alli händ s'Gfüühl, sie seged die Höchste.


Blick vom Sears Tower