Die Woche beni halt ned so flissig gsi, met Blog-Iitrag schriibe. Ich be zemli busy gsi ond ha schlichtweg kei Ziit gha. Noch de Arbet beni immer met em Suti onderwägs gsi. Jawohl, de Dick esch acho ide Stadt. Ond er hed scho en heide Froid am "Carlos" (rechtige Name David) ond em Kari (rechtige Name Jukari). Ond natürlich hed er au scho s'Vergnüege gha, de Richy kennezlehre ond esch hell begeistered gsi vo ihm.

Morn gömmer of New York, am 4:30 dörfed mer am Flughafe si...juhuii!

Ben as indieUNLIMITED, es Indie Festival ade Harbourfront gange. Det hed onter anderem "The Hidden Camera", en kanadischi Indie Pop Band es Konzert geh. Super Sach gsi, ond zo allem ane au no gratis. Vo dene 3 kanadische Bands, wo ich scho kennt ha, bevor ich do here cho be (abgseh vo 0815 stuff wie Nickelback, Brian Adams etc.) hani fast alli gseh. Am Konzert vo "Russian Futurists" ond "The Hidden Cameras" beni gsi, nor "Immaculate Machine" hani verpasst. Die hätted eigentlich au e show in Toronto gha, aber do beni grad met de Natalie ide Ferie gsi.

Am Friitig Obig esch nomol chli Kultur ofem Programm gstande. Mer send is ROM (Royal Ontario Museum) gange. Esch aber ned so de Knöller gsi, obwohls eis vode grösste Museum in Nordamerika segi. Es chli onstrukturierts Sammelsurium vo alte asiatische Vase, ägyptische Mumie, griechische Torsos ond usgstopfte Tier. Nochdem mer ois nochli anderwiitig kulturell bildet händ (alles muessi im Blog jo ned schriibe, sost hani gar nüt me zom verzelle diheime) hämmer ois weder mol dröber ufgregt, dass mer nach 2:00 Uhr kei Bier meh öberchonnt (oder besser gseit, scho am 01:56 nömme). Mer händ denn es paar Lüüt of de Stross aghaue ond noch eine vo dene angeblich illegale Bars gfroged, womer ebe no Alkohol bechonnt. Zwor händ alli gwösst, dass es das git ond au scho devo ghört, aber natürlich niemert gwösst wo.

Das esch jetzt wörkli en Öberraschig gsi. De Steve flüügt morn hei nach England ond drom semmer mit ihm es letschts Bier go trenke. Ich han mich nochher denn of de Heiweg gmacht ond ben in Streetcar igstege. Wo ich so in Streetcar iistiige ond langsam in hindere Teil vom Wage laufe, gsehn ich, wie öppert det hocket ond mich so komisch alueged. Es esch sone rechtig typischi Situation gsi. Zerscht hani dänkt, die kenn ich doch, denn weder, nei, ich tüsche mich. Ond ehre esch es gnau gliich gange. Ich be denn a ihrem Platz verbi gloffe, mer lueged ois beidi a, sie seid: "Häää?" Ich säge: "Ich glaub, ich spinne." Sie seid: "Was machsch denn du do?" Es esch Cindy Brunner vo Zorzi gsi. Sie hed in Toronto e Sprochschuel gmacht, goht aber morn id Ferie of Montréal ond Québec. Ond nebebii hani au no erfahre, dass sie in Oberehredinge als Lehrerin schaffed ond mini Schwöster, d'Pa kennt. Jawohl, Welt esch mängisch scho chli.

Am Mittwoch esch wie üblich oisi Pub Night ond ich hans weder mol gschafft, di letschti Subway z'verpasse. Welli de Streetcar au no verpasst han, heds chli en längere Heiweg geh. Daför hani folgendes Schild vor ehre Chile gfonde:

Alli Lüüt wo im BCE Place schaffed händ höt Mittag es gratis Mittagesse (entspricht eme Hamburger oder Hot Dog) becho. Das esch denn en zemliche Masseuflauf gsi. Wenn mer nor mol dänkt, dass beidi Towers 51 resp. 47 Stockwerk händ ond i jedem Stockwerk so ca. 200 Persone schaffed, denn send das scho mal 10'000 - 20'000 Lüüt gsi. Es hed e Warteschlange oms ganze Gebäude gha, esch aber dank 6 Fassstrosse no erstuunlich schnell vorwärts gange. Burger send met Hochdrock grilliert worde, so vel, dass de einti Grill vor luuter herablaufendem Fett afo brenne hed onds de met eme Füürlöscher händ müesse lösche.

Freitag, 18.08.2006
Noch de Arbet esch es losgange. Mer (Christiane, Moritz, Leo und ich) händ oises Auto abgholt, Grill, Zelt ond Chüelbox ufglade ond ois of de Weg in Sturgeon Bay Provincial Park gmacht. Das esch en Park, ca. 260km nördlich vo Toronto (also nor en Chatzesprong). Ohni grösseri Problem det acho, hämmer ois zerscht mol ofem Zeltplatz verfahre. Hed es wiili duured, bes mer oisi campsite gfonde händ. Ofem Zeltplatz hämmer denn au de Roderik troffe, wo direkt us Sudbury cho esch.



Samstag, 19.08.2006
Nochere Nacht met Bsuech vo mehrere Waschbäre hämmer am Samstig es Motorboot gmieted ond send chli ofem Georgian Bay (eine vo dene grosse See in Nordamerika) met sine 30'000 Inseli omegfahre. Eigentlich hämmer welle met em Kanu omepaddle, doch die send scho alli uusbueched gsi. Doch im Nachhinein gseh, esch Motorboot di besseri Wahl gsi. Mer send so chli wiiter im Züüg omenand cho ond händ honderti vo Cottages chönne bewondere. Es get glaubs kein Egge ond keis Inseli, wo ned es Cottage droffe stoht. Met em Navigiere im seichte Wasser hämmer mängmol au chli müeh gha. Hed denn halt es paar Kollisione mit Felse geh. Am Obig hed min Grill nomol alles geh ond mer händ es uusfüehrlichs Barbecue gha. Ide Nacht semmer denn vo es paar Regetropfe öberrascht worde. Aber mis 29-Dollar-Wal-Mart-Zelt hed sini Taufi bestande, Wasserdicht wie en schwiizer Marke-Armbanduhr!



Sonntag, 20.08.2006
Nocheme feine Früehstöck (alli Toastbroot händ noch Burger ond grilltem Fleisch gschmöckt, well de Grill soooo voll Fett gsi esch) semmer met em Auto es Stöckli gfahre ond ime verlassene chliine Hafe chli go bade. Gäge de Obig hämmer de Roderik verabschedet ond ois weder rechtig

Ich han neuerdings mis eigene Business, zomindest pro forma. Ben Manager vonere Bar met em Name "Fresh Inc. Juice Bar". Wieso das? De Steve esch mittlerwiile weder zrogg of Australie ond wott näbem Studium Teilziit imene Falafel-Restaurant schaffe. För Bewerbig hed er no es paar Referenze bruucht. Ond well er no nie im Gastgwerb gschaffed hed, hed er halt es paar Referenze erfonde, wo er während sim Toronto Ufenthalt gschaffed hed. Ich warte jetzt jede Moment ofs Telefon us Australie, wo sich noch mim ehemalige Mitarbeiter erkondiged. En schöne Saft hämmer do zämegmixt! :-)

Höt hani di letschti Englisch-Lektion gha ond d'Schwiiz kulinarisch met eme Toblerone Schoggi-Mousse repräsentiert ... guet, gäll?!?

Im Röckblick gseh hani ned s'Gfüühl, dassi wahnsinnig vell Nois glehrt han. Halt so chli en Uffröscher vo scho lang weder Vergässnigem. Immerhin send mini Englisch-Kenntnis jetzt officially pimped by George Brown College ... pffft. Aber hed sich gliich glohnt, Lüüt woni det kenneglehrt ha send vo de ganze Welt cho(Äthopie, Brasilie, Kasachstan, Mexiko, Afghanistan, Kuba, Argentinie, ...) ond das esch ganz interessant gsi.

In Toronto gits öberall di sogennante bike ring and posts. Das esch sonen Metallpfoste, womer s'Velo dra abgschlüsse cha. In ganz Toronto gits anschiinend 16000 vo dene Pföste. De folgendi Velofahrer heds System vo dem glaubs aber ned ganz begriffe...

Wenn ich amigs gfroged werde, woher ich chome, denn frog ich immer zrogg: "What do you think?" Ond höt esch mer scho zom dritte Mol passiert, dass eine gseit hed "Spain". Anschiinend gsehn ich meh wie en Spanier us als wie en Schwiizer? Sie händ immer s'Gfüühl Schwiizer müessed blondi Hoor ha.

Vollwaschmittel gits in Kanada ned. Drom gseht di wiisi Wösch nochem Wäesche au ned wiiss, sondern meh so schmodelig dreckig us. Bleichmittel muess vo Hand dezue gschötted werde. Han mich höt leider i de Konzentration vertoh: Mini hellbrune Hose händ chli en Farbveränderig duregmacht ... hoppla!

Ben höt Obig met de Chrissi ond em Leo am "Taste of Danforth" gsi, es Festival in Greek Town. Ond öppe scho zom 10. Mol hani di letschti Subway verpasst. Ich weiss ned, was ich falsch mache, aber ich luege immer zue, wie di letschti Subway abfahrt ond ben am warte, bes denn mol eine chonnt ond seit: "No more trains tonight." Ond denn heisst amigs z'Fuess heilaufe. Aber ehrlich gseit, macht mer das gar ned so vel us. Ich gnüsses fangs. Met eme Hot Dog seeleruehig Yonge Street (di längsti Stross vo de Welt, startet in Toronto ond goht dor ganz Kanada) derab bis zo de College Street. Mängsmol trifft mer sogar "Kollege" a, z.B. höt de George, wo mer sini halbi Läbesgschecht verzellt hed.

Zom weder mol so rechtig z'Schlemme send mer Ustuschstudente ines koreanisches Restaurant gange ond händ es all you can eat Tischgrill-Menu gha. Ond de Gspass choschted nor $13! Das esch ohni ergendwelche mageföllendi ond öberflössige Biilage, nor purs Fleisch ond Fisch! Hmmmm ... guet gsi!

Noch dere Völlerei hämmers met Clubbing probiert. Es esch jo ned eso, dass in Europa Musig ide Clubs immer 1A wäri, aber do spelleds de ganzi Obig nor so RnB ... ächzg! Ond am 02:00am werd mer usem Club "usegrüehrt". Es werd kei Alkohol meh usgschänkt, was zor Folg hed, dass alli Lüüt heigönd.

Han höt im Englisch-Kors de Abschlusstest gha. So rechtig en Ami-Test mit achrüzle ond Löcke usfölle. Sälber schriibe muess mer fascht nie.

De Roger Federer esch im Roger's Cup in Toronto dick dinne. Ich glaube, de Roger esch so zemli de bekanntischti Schwiizer do enne. De kenned alli ond send begeistered vo ihm.

Alli Terror-Warnlampe stönd jo weder mol of donkelrot ond di patriotische Fernsehsender zeiged met Musig ontermalti Statements vom El Presidente. Börse-Kommentatore im Fernseh roted eim, Aktie us Länder met gringerem Terrorrisiko wie Schwiiz oder China z'chaufe. ABB werd grad zom Chauf empfohle, Infrastruktur-Aktie segged weder in.

Am Friitig Obig semmer gstartet ond so öppe z'Nacht am 2 in Montréal im Hotel acho. Wells scho chli spot gsi esch, send die meiste Lokal scho gschlosse gsi ond mer send im Schwule-Quartier glandet. A dem Wochenendi send grad "Out Games" gsi, en internationale Gay Sport-Aalass ond drom heds nor so gwimmled vo Schwule. Han glaubs no nie so vel sich kössendi Manne ofs Mol gseh.

Am Samstig händ mer ois chli in Old Montréal ond ade Waterfront vergnüegt ond send denn no of de Mont Royale ufegstige ond händ Ussicht öber d'Stadt gnosse. Ich wördi jo gern es paar Föteli zeige, aber mini Kamera hed glaubs grad de Geist ufgeh.

Am Sonntig send mer denn of de Place des Arts ond is Museum of Contemporary Art gange. Gäge de Obig send mer of Ile Ste Helene anes Festival ond händ chli Party gmacht. Foti halt leider au ned verfüegbar.

Am Mäntig hämmer chli länger usgschlofe. Gstärkt dor de Zmittag ond ei Parkbuess spöter hämmer ois den weder mit oisem Minivan zrogg of de Heiweg nach Toronto gmacht, womer Znacht am 11i noch ewiglanger Fahrt ond veeel Stau endlich acho send. Obwohl mer s'Auto in Toronto regelkonform parkiert händ, hed mich höt Morge weder en gelbe Parkbuesszettel erwartet. Ich muess jetzt morn ofs Grecht go ond die Parkbuess beanstande, well oises Auto esch korrekt gstande!

Läck bobby, Studente chönnt kompliziert si. Am Mäntig hämmer frei (civic holiday) ond drom es langs Wochenendi. Ich gange met 6 anderne IAESTE Studente of Montreal. Ond de Trip organisiere esch en nightmare gsi. Ha no selte so komplizierti Lüüt troffe. Keine fühlt sich verantwortlich öppis organisiere, riese Diskussione, öb mer ein Minivan oder zwoi "chlineri" Autos miete selled, de einti chonnt nor mit, wenn alli Sitzplätz usbueched send, wells soscht z'tüür chonnt ond drom de Entscheidigsprozess om 4 Täg verlängered, de wo seit, er organisieri Onderkonft chonnt 2 Täg vorher damet, dass er kei Kreditcharte hed ond drom Hostel ned hed chönne bueche ond ond ond. 4bR-Ziite send degäge grad harmlos gsi. Jedefalls hämmers denn doch no gschafft...mer fahred morn Obig ab ond chömed am Mäntig zrogg. Tschüss ond weg!

Jetzt hani grad öppis zemlich loschtigs erläbt. Töre vode Subway in Toronto schlüssed zemlich rigoros. Normalerwiis send so elektronische Törschlüssalage sehr empfindlich istellt ond gönd grad sofort weder uf, wenn öppert iklemmt esch. Ned so in Toronto. En Typ hed im letschte Moment no ine welle, Töre esch zue gange ond hed ihn grad bim Hals iklemmt. Sin Chopf esch ide Subway inne gsi, de Reschte no dosse. Hed zemli loschtig usgseh. Ich ben ihm z'Hilf grennt ond zäme hämmer Töre met aller Chraft chönne en Spalt ufdröcke ond er esch inegschlöpft. Vode schwarze Gummidichtig ade Töre hed er aber of beide Bagge vom Gsicht zwoi langi schwarzi Streife gha, wie en Ströfling. Sin Kommentar esch nomme gsi: "Oh my God, don't do that at home kids!"

Nochem Englisch-Kors beni met es paar anderne Kors-Teilnehmer no eis go zieh. Metcho send en Mexikanerin, en Albaner, en Äthopier, en Venezulanerin ond en Portugies. Ich han denn de Mexikanerin versuecht erkläre, dass mer Tequilla ned nor met Salz ond Zitrone, sondern au à la barfuess met Orange ond Zimet trinke cha. Zerscht hed sie's mer ned welle glaube, aber am Schloss esch sie ganz begeistered gsi ond hed gmeint, das müessi sie ombedingt au usprobiere. Ond "Senõr López" hed sie leider au ned kennt, trotz mim Versuech, ehre s'Lied vorzsinge.