Obwohl Toronto (nor) amene Süesswassersee lieht, heds no en schöne Strand. Wie chönnts au anderst sie, werd de Stadtteil "The Beaches" gnennt. Doch es esch im Momänt en riese Kontroverse im Gang, öbs jetzt "The Beaches" oder "The Beach" heisst, well eigentlich esch es nor ein Strand. För en Osländer ned nachvollziehbar, werdet öber das Thema sogar Talkshows im Fernseh abghalte.

   

Am Obig beni ines japanisches Restaurant go Sushi esse, zom erste Mol i mim Läbe! Leider send Rölleli ned ofeme Förderband zfahre cho, deför hed de Chefchoch met some gföhrlich lange Sushimesser omehantiert. Hed mer hervorragend gschmöckt ond esch do in Toronto sogar bezahlbar.

Brrrr: Well ide Wohnig sett 3 Täg de Boiler ond Heizig nömme funktioniert ond ich chalt muess dusche (Wasser chonnt mer chälter vor als i jedem Sommerlager). Verosse esch es eigentlich ned so chalt aber im Huus inne früür ich mer de Arsch fascht ab. Han jetzt de Bachofe zonere Heizig omfonktioniert. Sobald i heichome, Bachofetöre uf ond vollpower heize. Funktioniert no guet ... Ricky wird froid ha öber di nöchschti Stromrächnig (ond Strompriise send im April um 16% Prozent erhöht worde *harharhar*)

Grrrrr: Well ich sett drüü Täg min Vermieter versueche erreiche damit de Boiler endlich gflickt wird. Er esch nie dihei, Telefon nemmt er ned ab, Handy au ned, Beantworter losed wohrschendli au ned ab, SMS ignoriert er ond Mail schriibt er ned zrogg.

Schlürf: Well ich mer es riesigs Steak kauft ha ... ond er werdet iiversöchtig sii, wenn er de Priis ghöred: $3.00 (ond de Teller esch denn ned öppe chlii!)



Wiuiuiuiuiu: Well bim Choche ond Abrote vom Steak de Füüralarm mol weder losgange esch.

"Hi Andreas,

I'm going through some changes in my life right now that unfortunately will affect you. My girlfriend is moving in with me and we will be taking up the whole of the second floor. This email will have to serve as notice for termination of your lease agreement with me. You can stay all of May and leave on May 31st.

It's with lots of regret I have to tell you this because you are a great tenant. [...]

Thanks for your understanding,
Ricky"

Blablabla ... ich säge nor: This guy suckz! Well wo ich ihn (Ricky = mein Vermieter) vor 4 Täg gfroged ha, was so abgoht, esch no alles in Butter gsi. Drom ben ich jetzt halt weder of Wohnigssuechi ond höt scho go zwoi Wohnige aluege. Jedefalls langwiilig werds mer so ned. Of das abe beni met de Gwen imene coole Kafi gsi ond ha mer es riesigs Stock Schoggitorte gönnt (ha nocher gar kei Znacht me möge).

Höt esch Mittwoch ond es git gratis Itrett id Art Gallery of Ontario (AGO). Ich ha die Glägeheit welle notze ond be met de Chrissie (Arbetskollegin) det here. Zom Glöck ohni Itrett z'zahle, well de hetti bereut. Esch ned so de Hammer, aber immerhin beni det gsi. Om dem Alass doch nochli en Sinn z'gäh, händ mer halt chli anderi kulturelli Aspröch befrediged ond send no es paar Bierli go zwitscherle :-)

Ofem King Streetcar, das esch die Tramlinie wo ich am meischte fahre, heds de loschtigsti Tramchauffeur, won ich je gseh ha. Höt hani weder mol s'Vergnüege gha, met em z'fahre. De Name vode nöchste Station tuet er immer singend asäge ond zwor immer so Opere-mässig. Ond au soscht esch er immer am Witzli mache ond wenn er en Kolleg gseht, denn huuped er amigs wie wild omenand. Eigentlich esch er meh Pauseclown als Tramchauffeur.

Obwohls die ganzi Woche guet Wetter gsi esch, heds am Wochendi eifach nor grägnet. Deshalb sind halt meh Indoor Aktivitäte ofem Programm gstande.

Am Samstig hed de Paul es australisches Menu koched. Om sis Gmües rechtig chönne zuebereite, hed er en Steamer bruucht. Wells das halt ned git, hed er sich chorzentschlosse eine baschtled:
Mer nemmt en verschlüssbari Plastik-Salatschössel, macht es paar Löcher ide Deckel, tuet chli Wasser ine, föllt s'Ganze mit Gmüess ond stellts för 13min in Mikrowelle. Leider hed de Paul verpasst z'öberprüefe, öb die Salatschössle au wörkli Mikrowelle-tauglich esch. Sie esch chli igschmolze ond hed jetzt no rächt witzigi Forme agno. Mer chönnt sie scho fascht als Alessi-Salatschössle verchaufe.

Höt beni met de Gwen im Honest Ed's gsi. Das esch es Shopping-Center volle Ramsch, wo chli Las Vegas mässig usgseht. Ganze Gebäude esch volle belligem China-Import, do send Coop-Pfanneaktione grad nüüt degäge. Hetti mer fascht es 3-teiligs Brotpfanneset för $4.30 kauft. Vor luuter Ramsch han ich mich sogar im Lade verirrt, han de Usgang fascht nömme gfonde.

Hahaaa....useme PVC Abflussrohr ond ere Bienewachscherze usem 1 Dollar Shop haend de Paul ond ich es Didgeridoo baschtled. Ond es fonktioniert sogar, ich chas au scho es betzli, zomindest tönts Asatzwiis wie es Didge ... nor de Schnuuf goht mer nochli schnell us, aber för das hani jo no min Kors-Guetschiin :-)

Produkt, wo in Kanada onderem Label "Swiss" verchauft werdet, ond ich ide Schwiiz no nieneds gseh han:

- Di jenschte Schoggi-Marke met Schwiizer Chrüüz droffe
- Swiss Cheese (aber mit Hiiwiis: Product of Canada)
- Guetzli wo usgsähnd wie Kambly oder Wernli, aber ebe kei sind, obwohl Swiss droffstoht.
- Swiss Chalet (Fast-Food Chetti à la McDonalds, Burger King etc. ond alli händ s'Gfüühl es segi schwiizerisch)
- Butter mit Hiwiis "Swiss flavor" ... kei Ahnig was am Butter schwiizerisch schmöcke sett
- Rucksäck ond Laptoptasche mit Schwiizer Chrüz

Einige Sache stammed sogar us de Schwiiz:
- Sigg Fläsche
- Strellson Jagge
- Freitag Täsche

Ah jo ... ond denn händs amigs no s'Gfüühl, bi ois segis de ganzi Winter donkel ("I'm Swiss, not Swedish!!") ond mer läbed alli ide Berge.

Out!

Ich han min Znacht koched, Pouletgschnetzlets anere Sweet and Sour Sauce mit Riis. Ond wo ich voller Elan s'Fleisch am abrote gsi be, esch doch de bloody fire alarm losgange, wells halt es betzeli grücht hed (aber wörkli nor es betzli!). Ich ha dänkt, mache s'Feischter ond Töre uf, dass es Dorchzug git ... Resultat devo: De Rauchmelder im Gang hed au agää ond ich ha zwoi so kreischendi Sirene gha. Also de zwoite Versuech: Alli Chnöpf am Raumälder drocke ... vergeblich ... sauluut esch es gsi, mini Ohre send jetzt nochli betäubt ... also dritte Versuech, Batterie usem Rauchmelder neh ... leider Rauchmelder direkt am Stromnetz aghänkt ... deför hani e Chochischabe ufgschreckt, wo sichs im Raumelderghüüs igneschted hed ... glöcklicherwiis heds denn einisch ufghört ... Füürwehr nonig cho, no kei verstörti Nochbere ome. Fazit: Rauchmelder funktioniert tadellos!

PWYC bedeutet soviel wie pay-what-you-can. Das esch in Toronto no rächt gängig ond fonktioniert folgendermasse. Mer goht zo de Kasse ond wird gfroged: "Wievel möchtisch du höt zahle?". Ich liebe das!!

Höt Obig beni am Images Festival (www.imagesfestival.com) gone Serie Chorzfilm vo Filmstudente luege. De Itritt esch ebe nachem PWYC Prinzip organisiert gsi. Mängmol werd das sogar im Usgang agwändet. Aber au sost send Itrettspriise do amigs sehr moderat. Mer esch sich us de Schwiiz halt einiges gwöhnt (de Australier beklagt sich nämlich emmer wie tüür es esch, au wenn ichs bellig fende).

Hahaha...er glaubeds ned, wies tönt, wenn en Asiatin en Linth-Osterhaas isst. Gwen schmatzt näbe mer grad fredlich vor sich hii....tönt öppe so wie wenn en Hond sin Fuettertopf usschläckt om au möglichst jede Spiisreschte z'verwötsche. Mer ghörts jedefalls in voller Luutstärki, dass es ihre schmöckt!

Vellecht esch mer sich das als Schwiizer eifach ned gwöhnt, aber do in Toronto werd mer rächt hüüfig wäge Münz aghaue. Am Afang hani amigs us Mitleid no öppis geh doch mittlerwiile gohts mer scho fascht of de Geist ond ich gebe nor no öppis, wenn die betreffendi Person ergendwas speziells büüted, z.B. wie de vo gester, wo ofeme Hydrant obe gstande esch ond i einere Luutstärki Bibel-Zitat à la Samuel Jackson in Pulp Fiction vo sich geh hed.
Eis hani müesse lehre: Mer dörf jo nie eifach nüt säge. Mindestens es "No" esch zwingend. Han höt nämli eine zemli hässig gmacht, welli ihn eifach ignoriert han. Doch eigentlich esch es scho bedenklich, wie vel gstrandeti Existenze es do git.


Er hed bhaupted, es segi sin 54 Geburtstage ond hed Mönz för es Geburtstagsbier welle. Ich han im denn vorgschlage, e Gebortstags-Foti met de Gwen (WG-Mitbewohneri) z'mache.

Donnerstag, 13. April
Die Woche esch jo zom Glöck ganz chorz gsi ond drom au enorm schnell verbii gange. Mis Wochenendi hed drom am Donnstig Obig met Jam'n'Drum'n'Dance agfange. Das esch no ganz wetzig gsi, e Jam Session imene Club, ergend es paari händ zäme eifach chli improvisiert ond im Publikum händ alli met Bongos, Rassle, Tschinelle oder sost halt eifach chli metmusiziert ond ometrömmeled.

Freitag, 14. April
Am Good Friday esch ned wörkli vel los gsi, well alli Läde gschlosse gsi send (ond das esch do in Toronto wörkli en Usnahm, normlaerwiis esch au am Sonntig fascht alles offe). Drom send mer (=Gwen, Paul ond ich) is Gay Village gange. Det händ mer ois amene Gay Bingo amüsiert. Das esch eigentlich es ganz normals Bingo, nor werdet Zahle sehr sehr schwuuul vorgläse. Han mich mängsmol rächt müesse zämmerisse, well rechtig dröber lache esch det ned so abrocht gsi. Am Nommitag send mer denn of China-Town go shoppe, well Chinese jo kei Ostere känned ond det drom alli Chinese-Läde offe gsi send....eifach es Erläbnis! S'einzige mer bekannte Produkt imene Chinese Supermarkt esch Ovomaltine, jedoch of Chinesisch agschrebe (siehe Foto). Am Obig händ mer eigentlich in Usgang welle ond zom ois stärche, vorem Usgang för es halbstöndli es Nickerli mache. Leider send alli ipennt. Am 23 Uhr semmer weder ufgwacht, händ Znacht gässe ond no Crocodile Dundee of DVD gluegt, de Lieblingsfilm vom Paul (=Australier).

SPAM ide légere Variante	Ovi of chinesisch

Samstag, 15. April
Höt Morge send mer scho bi Ziite ufgstande ond met de Fähre of Toronto Island gfahre. Das send es paar vor Toronto vorglagereti Insle, es Erholigsparadies för alli Stadtbewohner. Die verschedene Insle send met Bröggli metenand verbonde ond es esch perfekt zom Velofahre oder Rollerblade. Well Saison erst grad gstarted hed, heds nonig so vel Lüüt gha ond es esch no rechtig gmüetlich ond erholsam gsi. Wetter esch rächt warm gsi ond ich han mer dommerwiis scho s'erstmol de Näggel verbrännt. Am Nommitag semmer chli dor Queen Street gschlendered...ond ich be jedesmol meh begeistered vo dere Stross. Han no nie e Stross met so vel Läbe ond so loschtige ond usgflippte Läde gseh. Es get riesige Läde met so 70 Johr Retro-Artikel, Antiquitäte-Shops, chinesische 1-Dollar-Shops (alles för 1 Dollar....die onglaublichste Sache!) ond gmüetlichi Kafis (z.B. gits es Knitting Café...zom Kafi chamer Noodlä ond Wolle uswähle ond während em Käfele lesmle). Ond s'Beschte esch denn no de Garage Sale gsi. En Lehreri vo Toronto wandered för es Ziitli of Südafrika us ond hed drom alle ehre Huusrot (Möbel, Chleider, CD, ...) müesse loswerde ond drom i ehrem Garte, Garage ond Huus inne chli Flohmarkt gmacht. No rächt e witzige Sach gsi...eis feilsche ond handle...vode Chleider öber CDs, DVDs bis zom Schissi-Bäseli...eifach alles!

Blick of d'Skyline vo Toronto Island us.

Sonntag, 16. April
En typische Sonntignomittag im Kensington Market: En melting pot vo verschedenste Natione, Hippies, Punks, Familie met Chind + Chegel, Hardrocker, Reggae-Type, Hip-Hop Gangstas...hauptsach alli send chli usgflippt. Nor eis findet mer det ned: Sonnecrème. Bin i 5 Läde gsi ond han denoch gfroged. Alli händ mich usglached ond gseit, das brüched sie ned. "Jah man...it's a beautiful day!"
Am Ostermäntig dörfi weder go schaffe, well de Fiirtig kennt mer do in Kanada ned. Mer chönnd ois ide Schwiiz glaubs sowieso glöcklich schätze, do hed en Arbetnehmer im ganze Johr nämli nor 2 Woche Ferie!! Ond Chöndigongsfrist betreit 2 Woche. Es gelted halt chli liberaleri Bedengige als im alte Europa.

Näbe de ganz normale, chli provinzielle town houses (so eis wie ich wohne) gits in Toronto au es paar recht spezielli Gebäude. Mer gfallt ned alles, zom Teil för min Gschmack chli öbertrebe, aber iidröcklich esch es schono. Im Moment wird z.B. grad Royal Museum of Ontario vom Daniel Liebeskind ombaut ... sehr futuristisch ... aber aber ned so nach mim gusto.

Höt esch es zom erste Mol chli wärmer gsi ond ich ha die Glägeheit gnotzt, chli am See entlang z'jogge. Mini Winterpause hed sich aber gli bemerkbar gmacht, so wörkli möge hani nämli ned.

Ond wells mer chli langwiilig gsi esch, hanis mol mit Selbstporträts versuecht. Dank minere 120 Franke Digicam werdet die bi schlechtem Liecht zwar nie rechtig scharf, aber grad das fendi s'geile a dere Kamera.

Downtown Toronto chan mer ned nor oberirdisch, sondern au onterirdisch erläbe. Ide Innestadt existiert es Netz vo onderirdische Shopping Malls, vergliichbar met em ShopVille im HB Züri (jaja...weder emol en Vergliich met Züri...aber ich muess oich doch öppis vergliichsbars ide CH chönne vorwiise). Das ganze erstreckt sich öber e Längi vo 27km. Natürlich esch das ned vo höt of morn entstande. Jedes Hochhuus hed sin "Chäller" ond die Chäller send denn metenand verbonde worde. Also ich versueches scho gar ned, mich i dem Tunnelsystem chönne z'orientiere. Das ganze begröndet sich damet, dass es in Toronto im Winter sehr sehr chalt chan sii ond sich d'Torontonianer(??) drom halt in Bode ie grabe händ.

A dem Wochenändi hani versuecht, mol Stadt chli nöcher kännezlehre, well onder de Woche bliibt mer gar ned so vel Ziit do derzue. Han drom am Samstig mit de Christina (Arbetskollegin) abgmacht, om nach Chinatown z'go. Agfange hed das ganze mit ere chliine Panne, well ich amene andere Ort gsi be als Chrissie, aber mer händ ois denn en Stond spöter doch no gfonde. Vo Chinatown bin ich regelrächt begeistered. A de Fröchtständ wimmleds nor so vo Lüüt, eis Gschrei ond Chinesisch-Gegacker. Nochere Stärkig imene feini Kafi semmer den no d'Hippie-Hochburg, de Kensington Market go erforsche. Gäge de Obig zue beni denn no im St. Lawrence Market gsi.



Am Obig hed mich Gwen in grösste Club vo Toronto (The Guvernment) mitgschleickt. Dementsprechend scheisse(!) esch au d'Musig gsi. Also det beni zom erschte ond letschte mol gsi. Aber das ganze hed gliich no sini witzige Siite gha, chli en anderi Atmosphäre als bi ois im Uusgang. Es hed det nämlich nor so gwimmled vo Asiate (>80%), mängsmol ben ich mer gar ned so vorcho, wie ich in Kanada be. Ond erstuunlich esch au, dass bide Asiate ned nor die jöngere, nei au älteri (secher 35-40 Jährigi) zo üblestem Techno-Sound am omehöpfe gsi send. Es hed au so es paar Suti-Type gha, wo oben ohne omegloffe send om au jo allne ihri kreatin-gschwängerete Muskle chönne z'präsentiere.

Am Sonntag hani eigentlich of de Ontario Place welle, en Freiziit-Park am Ontario-See ond ganz nöch bi minere Wohnig. Das ganze esch aber gar nonig göffnet gsi, es esch au nochli z'chalt do dezue (-4°C), da muess zerscht de Sommer nochli cho. Drom beni denn halt chli dor Queens Street gschlendered ond han alli Lädeli beguetachted. Queen Street chamer sochli met em Niederdörfli vergliiche (nor dass es kei Altstadt esch ond halt vel grösser).

Also dass zwoi Eichhörnli vorem Fenster omenandturned esch scho fascht normal, aber gester hani no e anderi Entdeckig gmacht: En Waschbär esch frischfröhlich dor de Hinderhof gschlendered, de Baum deruf klättered ond hed sichs ofemene Ast gmüetlich gmacht. Zerscht hani das natürlich ganz loschtig gfonde, bis i gmerkt ha, dass de Soucheib ois för d'Türe gschisse hed!!

Also Foti vo minere Wohnig gits e keini, well wörkli speziell esch sie ned (ond Batterie vo minere Digicam au grad leer). Deför hani es paar Fotene vode Omgäbig gmacht (folgen bald). I 3 Minute Fuessmarsch ben ich direkt am Ufer vom Ontario-See, was ich sehr schätze, ond alli Lüüt händ mer bisher gseit, dass das im Sommer praktisch segi. Aber im Momänt esch es nochli z'chalt do dezue. Au "next to the door" liehts sogenannte Liberty Village. Das esch es ehemaligs Industrie-Quartier, wo wiederbeläbt wird. Alti Fabrike werdet i Büros ond Lofts omfonktioniert. Es hed debi vor allem Firmene us de Medie-Branche (Sony-BMG, Werbe-Firmene, Animations-Studio etc.).

Tram do in Toronto send no witzig. Iistiige müend alli Lüüt immer vorne bim Chauffeur. Billetautomate gits e keini. Tramhaltestelle send öberall det wo es Rotliecht esch, well Tram det jo eh ahalte muess ond denn grad no d'Lüüt ine ond use loh cha. Aber s'Beschtä chonnt noh: Ade obere Fensterkante heds e Leine (wie e Wöschleine) dors ganze Tram dore. Wenn mer wott usstiege, denn muess mer eifach a dere Leine zieh ond es glöggled bim Chauffeur vore. Das esch vor allem guet för älteri Lüüt oder Lüüt mit ere Gehbehinderig. Die chönnt eifach mit erem Stock ade Leine risse, müend do dezue ned emol ufstoh oder zome Drockchnopf laufe.

Tja, ond höt verzell ich mol öber di negative Siite vomene Büro im Wolkechratzer ofem 27. Stock. Es esch saueng, stickigi Luft chonnt nor os de Klimaalag ond mer schaffed de ganz Tag bi Konstlicht, well di geile Bueros ade Ossesiite mit Fenster ond Uusblick werdet natürlich nor als meeting rooms ond Bueros für CEOs bruucht. Aber deför send mini Mitarbeiter no lostigi Lüüt. Ide Firma schaffed gnau ein einzige Kanadier. Die andere send: Amerikaner, Deutsche, Jugoslav, Inder, Chinese, Russin, Iraner ond Syrer. Met de Russin hani höt scho riesigi Diskussione gha. Esch no rächt krass, wie die immer no ihrem kommunistische Russland nochetruured. Ergend wie gsähnds di kommunistischi Ziit völlig romantisch ond händs Gfüühl, döt hegi de Staat för alli gsorged, alli händ z'ässe gha ond es hegi jo funktioniert. Ond denn hett sie no welle bhaupte, di westliche Medie mached Propaganda ond brechted nor schlächt öber Rossland, well Europa Rossland of kein Fall ide EU wott. Mol luege, ich chan sie secher no öberzüüge, en rechtige Europa-Fan z'werde :-)

Gebäude vom Büro (das met de Zagge)	Gallerie ide Lobby vom Büro (vom Architekt Santiago Calatrava)

Gester han ich also mit Schaffe agfange, wobi Schaffe chan mer dem minere Meinig noh nonig saege. Mini Praktikums-Firma (HelpCaster Technologies, http://www.helpcaster.com ) esch im Momaent grad anere Maess ond alli send chli gstresst gsi ond keine hed so woerkli Ziit foer mich gha. Drom han ich halt saelber chli Beschaeftigongstherapie betrebe ond chli for mich heretoempled.
Buero vode Firma esch imene Hochhuus im 27. Stock (Foto folgt noch) ond ich saege oich, die Lift wos do haend send de Hammer. De Lift vom 1. in 27. Stock esch schneller als en Lift ide CH imene stinknormale Parkhuus. Am Afang hani zemli mueh gha mit em Liftfahre. S'Gfuehl im Mage esch chli komisch, wenn dor Beschluenigong Iigeweide dorenandgschoettled werdet ond mer chonnt immer sochli weichi Chnueue oeber. Weni usem Lift usgstege be, ben mer immer vorcho wie bsoffe. Aber noch es paar Mol gwoennt mer sich do dra.

Höt han ich mer mol s'obligate Touriste-Programm z'herze gno ond be ofs "largest building of the world" (553m) ufe...de CN Tower. Natürlich erföllt das nor di obersti Spitze vom Torm ond Bsuecherplattform esch chli wiiter onde (346m) ... aber immerhin. No Iidröcklich esch de "glass floor", en Glasbode womer cha druufstoh ond bes an Bode abe gseht.
Am Obig beni denn mit ere Arbetskollegin ond dere erem Frönd imene Jazz-Club es Bierli go. Ich glaube, de Club chönnti scho bald zo eim vo mine Lieblingsplätzli werde, det here goni bestimmt nomol!

Also zerscht möcht ich nomol es Dankeschön a alli usrichte, wo am Friitig an Apéro verbii cho send. Esch cool gsi, euch all nomol z'gseh. Nochere sehr chorze Nacht (ca. 1,5 Stond gschlofe) esch de Wecker am 05.10 weder abe ond mer send uf de Flughafe. Dementsprechend esch min Zuestand dor de höttigi Tag gsi, so en Duur-Dämmer-Zuestand. Am Flughafe in Toronto acho hani mer denn es Taxi gschnapped, om ned met em ganze Gepäck dor di halb Stadt z'irre. De Ricky, min Vermieter, hed mich denn fröndlich empfange ond grad mol ofe Tour dors Quartier metgno, woner mer die wechtigschte Sache so zeigt hed. Jedefalls eis esch mer höt klar worde. De Kanadier fahrt Auto, au wenns nor om de Egge in Lade zom poschte esch.
Ond entgäge vo allne scho korsierende Gröcht chani bestätige: De Ricky esch definitiv ned vom andere Ufer! :-)