Gester Obig hani bes spot id Nacht ine mini alti Wohnig müesse potze. Ond höt beni noch de Arbet i di neu Wohnig zögled. Ich dörf amol nömme vel Sache chaufe, mini Koffere-Kapazität esch scho jetzt ade obere Grenze gsi.
Wohne tueni jetzt im Oste, ade Gerrard Street East (vorher hani im Weste gwohnt). S'Viertel do heisst Cabbagetown, esch ursprönglich s'Viertel vode irische Iwanderer gsi. Kenne mich aber i dere Gegend no ned wörkli us.
Zimmer esch okay, hed zwor chli en komischi Farb (sones olivgrüen), devör aber en Ventilator. Das esch glaubs ganz praktisch för de Sommer. Mini beide Mitbewohner send de David us Kolumbie ond Yukari us Japan (hoffe jetzt mol ich han ehre Name rechtig gschrebe). Schiined beidi no ganz netti z'sii.

Höt hani s'erste Mol so rechtig Grossstadt-Smog erläbt. Es esch sehr füecht ond heiss, drom also rechtigs Smog Wetter. Öber de Innestadt esch en riesigi Nebelwolke ghocket, teilwiis hed mer de blaui Himmel gar nömme gseh. Eigentlich recht e bedenklichi Sach.

Wäääh ... ben grad voll am lätsche ... ned öppe welli heiweh ha ... neinei, ben grad am Zwebele schniide. Ond Zwebele do sin riesig, wohrschendli genmanipuliert. Drom brennts au dementsprechend ide Auge.

Höt esch voll Post abgange in Toronto. TTC, das send Toronto Verkehrsbetrieb (Subway, Bus ond Tram) händ onaköndiged gstreikt. Ben ade streetcar station gstande ond han mich gwondered, wieso so vel Autos ond Taxis ome send. Ergend en Velofahrer hed mer öppis zuegschroue, ich hans aber ned verstande ond chli i mim morgentliche Delirium wiiterträumt (esch gester ebe chli spot worde). Bes denn e Frau zo mer cho esch ond gseit hed, dass im Fernseh brocht hägid, dass TTC Mitarbeiter streiked. Han zerscht versuecht, es Taxi verwötsche ... hoffnigslos gsi, well das händ alli 2.3 Mio. andere Passagier, wo TTC jede Tag beförderet au gmacht. Han mich den halt z'Fuess of de Weg gmacht.



Downtown esch e rechtigi Völkerwanderig gsi. Sogar de Börgermeister händs im Fernseh brocht, wie er met em Velo hed müesse go schaffe go. Er heds aber gar ned loschtig gfonde, esch zemli hässig gsi. Well d'Lehrer ned id Schuele cho send, händs alli Schuele müesse schlüsse ond Chind händ en Tag frei gha. Noch eme 40-minütige Fuessmarsch beni denn au im Büro acho.

De Steve D. (Australier), de Steve B. (Engländer), de Moritz (Deutscher) ond ich send bi herrlichem Wetter of Toronto Islands gange. Es esch im Momämt grad 33° C heiss, also scho rechtig Sommer.

Nochdem de Australier gmeint hed: "It's beer o'clock" simmer go Steam Whistle Brewery aluege ond händ sost no es paar Bierli zwitscherled. Ich glaube, das Bild seit alles:

Das Wochenändi esch d'Veranstaltig Doors Open ond verschendensti Gebäude, wo sost ned öffentlich zuegänglich send, chönnt gratis besichtiged werde. Doch leider ben ich ned de einzigi gsi, wo das hed welle nötze, öberall en riesige Schlange vo Lüüt voredra gha. Hans denn drom nor in Hauptsitz vode Canadian Imperial Bank of Commerce ond i di alti Börse gschafft.

Höt Nomittag esch au i minere Wohnig Doors Open gsi. Wells Huus verchauft wird, send meheri Interessente god Wohnig aluege. Woni heicho be, esch niemert ome gsi, weder Lüüt no Vermieter, doch Töre sperrhangelwiit offe ... aber zom Glöck nüüt wegcho, schiint alles no ome z'sii.

Höt han ich d'Erfahrig vo multikultureller Striitkultur gmacht.

Situation 1: Fernöstlich
Gester hani versuecht en Voice over IP Verbindig zode Nati id Schwiiz z'mache. Hed ned funktioniert. Ich han Problem reported, Iraner versuechts z'löse. De Technikchef Nabil (Syrer) merkt höt, dass es ned funktioniert (obwohl er förs testing verantwortlich esch). Er flippt total us, hed aber kei Ahnig vode Problemursach. Esch au keis Wonder, wenn mer erst am 10:15 is Gschäft chonnt, niemertem Grüezi seit ond au mit niemertem redet. Sin Chopf wird immer röter ond röter. Iraner versuecht im Problem z'erchläre, doch er losed gar ned zue. Chopf wird no röter, er steigered sich rechtig ine Histerie ine. Nabil goht usem Büro, ich froge so schüch id Rondi, öb mer das ned sachlich löse chöngi. Kanadier meint: "Andreas, believe me, that's nothing. He can do it even better. He is the funniest guy I've ever seen" ond foht voll afo lache. Han mer säge loh, das segi di abendländischi Kultur. Onerwarteti Stimmigswandel seged det ganz normal.

Situation 2: Holländisch - latinamerikanisch
Gruppenarbeit im Englisch-Kors. Holländerin esch ned sehr kooperativ, wott ehri Idee ombeding doresetze. Mexikanerin ond Venezuelanerin send voll betöpft ond schalted of stuur. Koreanerin seit nüt. Schwiizer versuecht Konkordanz weder herstelle, eigentlich esch er au ned iverstande, aber versuecht halt chli z'vermittle. Mexikanerin flippt voll us, weigered sich wiiterzmache (halt sonen rechtige Frauekrach). Koreanerin seit nüt. Mexikanerin ond Venezulanerin stönd uf ond gönd.

Yes, it's a funny day!

Han mich met 3 andere Studente troffe, wo au en Ustuusch met IAESTE in Toronto mached. Eine us Australie (woni schomol troffe ha), eine us England ond eine us Dütschland, wo aber zo minere Öberraschig au ade ETH gstudiert hed (wie glaubs fast alli Dütsche). Mer planed, de Mittwoch jewiils fescht för es gmeinsams Bier ime Pub z'reserviere ... mini Woche esch also fangs rechtig doreplaned. Dienstig hani Englisch, Mittwoch Biertreff ond Donschtig Englisch ond denn esch scho fast weder Wochenendi ... aber esch suuper so, denn goht Ziit bes zo mine Ferie chli schneller ome :-)

Ich hocke grad ide public laundry ond schriibe min Blogiitrag, währendem mini Wösch ide Maschine am waesche esch. Doch do min Brecht vode letschte paar Täg:



Freitag, 19. Mai 2006
Ben am Nomittag am 3 abdüüsed ond is Busterminal gange, grad no rechtiziitig, well es esch voll crowded gsi. Han denn aber grad no Glöck gha, ben de dritt letschti gsi, wos no mitgno händ. Nochere 6 Stöndige Fahrt beni in Ottawa acho ond han min Hunger imene indische Restaurant gstillt. Also Ottawa esch zwor Hauptstadt vo Kanada, aber i mine Begriff meh es Dorf als e Stadt. Sehr gmächlich ond gmüetlich. Ond jedes Huus hed en riesige Rase, die händ eifach vel zvel Platz do!

Samstig, 20. Mai 2006
Im Eilzugstempo ben ich vode Käthy (en entfernti Verwandti) dor Ottawa gfuehrt worde. Ich weiss jetzt wo di Französischi, Türkischi, Ungarischi, Chinesischi, Spanischi, Dütschi, Saudi-Arabischi, Kuwaitischi, Irakischi, Japanischi, Schwedischi ond Schwiizerischi Botschaft esch, wode Schwiizer ond de Israelisch Botschafter wohned (grad näbenand) ond sogar wos cottage vom Chef vom kanadische Gheimdienst esch.
Am Samstig Obig send bi minere temporäre host family Gäst iglade gsi. No ganz witzig gsi. De Bill (Schwager von Kaethy) esch am fireplace ghocked ond hed verzellt, wie er im 2. Weltkrieg ofere Corvette (Chriegsschiff) Fracht-Konvois nach Europa beschötzt hed ond do debi 43 Mol de Atlantik öberquert hed. Woni verzellt han, dass mer schwiizer Manne au alli is Militär müend, hed er natürlich en heide Froid gha. Han mich gwondered, wieso die bim fireplace nie müend Holz nochelegge onds emmer so gliichmässig brennt. Besi denn mol gmerkt han, dass das ganze nor en Bschess esch, womer per Chnopfdrock a- ond abstelle cha. Näbem Bill ond eme Schwiizer-Kanadische Ehepaar esch au no de Achmed Abdullah Something Something Nassir (kurz Mr. Nassir) det gsi. De esch us Qatar ond studiert zor Ziit in Ottawa. No loschtig gsi met dem chli rede. Er hed verzellt, dass sini Frau för ihn bereits bestimmt esch (sini Cousine, damet Mitgift ide Familie bliibt). Nor ein Hogge hed die ganzi Sach minere Meinig noh: Er hed sie no nie i sim Läbe gseh. Halt en anderi Kultur. Aber schono krass wie die im Geld schwömmed. Obwohl die kei Stüüre, Strom, Wasser ond Krankekasse zahle müend, finanziert ihm de Staat sis ganze Studium in Kanada. Ond wenn immer er wott, chan er gratis met de Qatar Airways heiflüüge.

Sonntig, 21. Mai 2006
Trotzdem dass Wetter ned so guet gsi esch, send mer (Käthy, ich, Mr. Nassir) met de Josephine (=Cadillac wo usgseht wie us 50er Johr aber Johrgang 1997 hed) öbers Land ghötterled. Zerscht semmer of Montebello gfahre ond händ im grösste Blockhuus vode Welt Zmittag gässe. Nochher semmer wiiter is Cottage vode Käthy. En Storm hed de Bootsteg vom Land losgrisse ond in See usetrebe. Also hämmer de müesse go zrogghole. De ersti Versuech met em Pedalo hämmer müesse ufgeh, well Pedalo es Leck gha hed ond immer meh ond meh versonke esch. Ich han min Hinter nor knapp chönne troche as Land rette. De zwoiti Versuech met em Kanu esch denn schochli erfolgriicher gsi. Esch aber cheibe streng, met eme Kanu en ganze Bootssteg z'zieh. Well de Mr. Nassir nor es T-Shirt gha hed onds chli chalt gsi esch, hämmer ihn met eme Badmantel ikleided. No loschtig usgseh. Stelled oich en Ölscheich ime typische 80er-Johr Frottébadmantel vor.

  
See bim Cottage ond Josephine

Mäntig, 22. Mai 2006
Nocheme typisch English breakfast im Mayflower Pub beni gos Parlament aluege. Halt sochli wie jedes Parlament ... vel Bilder ond Verzierige ... also mer gfallts Bondeshuus besser =) Scho gli hani denn weder of de Bus müesse (resp. hed en fascht no verpasst) ond es esch inere abentüürliche Fahrt zrogg of Toronto gange. Abentüürlich, well s'Getriebe kapott gsi esch onds jedes Mol bim Schalte voll chrosed hed. Hed amigs rechtig weh to ide Ohre ond ich han mich schwer an Hagebach Ziite zroggerinnered gfühlt. Doch de Bus hed Reis öberstande ond ich be denn doch no einisch (met 2h Verspötig) in Toronto acho. Han jetzt endlich mol chli meh vo Kanada gseh als nomme Stadt.

Dienstag, 23. Mai 2006
Min Englisch-Abigkurs hed agfange. Ond es hed ned emol ein einzige Schwiizer dete (zom Glöck!). Ond woni vo vom Kors heicho be, esch de Ricky (Vermieter ide alte Wohnig) am Treppehuus mole gsi. Ond de Quäggichopf hed natürlich ned nor d'Wänd, nei au Steggetritt wiis agmoled. Ben denn gliich doregloffe ... Sohle send jetzt halt chli farbig ond min Fuessabrock of jedem Tritt.

Ich han mer es Greyhound-Ticket of Ottawa kauft. Morn im spötere Nomittag gohts los ond ich bliibe bes am Mäntig det, well das esch de Victoria Day ond drom frei, en Rarität do.
Han zerscht en Mitfahrglägeheit met eme Auto welle organisiere, well das chli spannender esch als Bus fahre. Doch de Kanadier wo mich metgno hätti, hed chorzfrischtig de Trip abgseit, drom goni halt gliich met em Bus. Ben froh, dassi mol chli us de Stadt usechome, well ossert Toronto hani no nüüt vo Kanada gseh. Ich bsueche in Ottawa en entfernti Verwandti ond ehemaligi Schuelkollegin vo mim Mami. Die hed glaubs scho s'ganze Wochenendi för mich doreorganisiert ... wird secher spannend! :-) Also, es wird drom ide nöchste Täg kei Blog-Brecht geh!

Ciao!

Eigentlich esch s'Priisniveau in Kanada tüüfer als ide Schwiiz, obwohl mer muess immer schaurig ufpasse. Alli Priise send ohni sales tax agschribe, es werdet ade Kasse immer no 17% MwSt drufgschlage. Aber es git Produkt, die send eifach cheibe tüür. So han ich höt Morge z.B. $9.95 (CHF 10.80) för en Axe Deo müesse zahle. Ond Milchprodukt send au alli so tüür .... wäääääh! [kurzer Unterbruch] ... grad hochbrisanti Situation gsi ... während ich am Blog Itrag schriibe gsi be, hani Brotpfanne met em Öl vergässe ... schnell Fenster ufmache ond alli Ventilatore müesse istelle ... aber chan Entwarnig geh, Füüralarm för einisch ned los gange. Also, wo beni gsi ... ah jo ... Milch ebe so tüür, ond ned emol guet. Es git skim milk, 1% milk, 2% milk ond 3.25% milk. Das esch de Fettateil ond alles onder 3.25% muess mer scho gar ned probiere. 3.25% Milch schmöckt öppe so wie Milch Drink ide CH. 1% milk esch eifach nor en ongnüssbari wässrigi Brüehe. Ond au de Rahm (entspricht 18% milk) esch so dönn, öppe vergliichbar met schwiizer Kaffeerahm.

Wenn zwei amerikanische Autos auf einem Parkplatz mit europäischen Massen platziert werden:

Ich gebes jo zue, dä Iitrag esch ned nor vom hötigi Tag, sondern sammled Bildmaterial vo längere Ziit, aber zomindest esch er höt verfasst worde.
In Toronto herrscht im Moment en rechtige Bauboom. Wells ide Innestadt vel zwenig Wohnige get ond d'Lüüt langsam leid send, jede Tag im Stau z'stoh, werdet im Eilzugstempo sogenannti Condominiums (=Eigentumswohnungen) hochzoge. Das schiint recht populär z'sii. Natürlich heds i jedem Condo en Swimming-Pool (jewiils im oberste Stock, ned z'onderst), Fitness-Center, Shopping und eigene Security. Die Condos gliiched eis am andere, för mich so zemli de Horror, rechtigi Wohnsilos. Beidrockend esch, met wellere Gschwindigkeit do boued werd. Jedesmol wenn mer ufelueged weder es Stockwerk meh. Ich verstohne das ned so ganz, han s'Gfüühl ines paar Johrzehnt werd mer met Beduure of die Blöck zroggluege onds als Schandfleck vode Boomjohre abstempfle. Hämmer das ned schomol ide 60er Johre gha? Spreitebach ond Telli Aarau ahoi!

   
Ned nor Blöck gsänd alli chli gliich us, au Werbige gliicht einere de
andere ... chli rot ... chli blau ... oder chli möchtegern stylisch ond hip.

Sonntig esch Touriste-Tag, also ben ich chli de Harbourfront entlang gschlendered. Das esch s'ehemalige Hafegebiet wo revitalisiert worde esch. Han chli Schiffli aglueged ond sost chli omegfulänzt. Ben denn no is Design Exchange. Das esch di ehemaligi Börse vo Toronto, wo jetzt aber als Zentrum för gägewärtigi Design-Konst gnotzt werd. Anere Schwiizer Seniorereisegroppe beni au no öber de Weg gloffe. Han mich aber ned z'erchänne geh, nor zueglosed ond gschmonzled.


Recycling vo Fernsehgrät ade Harbourfront

Am Nomittag beni denn mol no voll inen Teenie-Tumult ine grooted. Ade Queen Street esch Studio vo City TV. Ond well det ergend sone Boygroup en Uftritt im Studio gha hed, heds nomme so gwimmled vo Teenies ond eis Gschrei ond Kreisch esches gsi. Im City TV Studio heds au en Speakers Corner. Das esch en Kabine, womer 1 Dollar Itrett muess zahle, denn werd mer gfilmed ond chan ergend en Darbietig mache oder e Message loswerde. Falls es de Regie gfallt, werd das ganze im Fernseh usgstrahled.

Han höt neui Schueh müesse poschte ond ben drom ade Queen Street gsi. Ond do debi hanis Kartoffelsacktheater weder gseh. Das esch en Typ wo versteckt imene Härdöpfelsack am Strosserand hocket ond wenn mer anem verbii lauft, hebt er en Figur usem Sack use ond foht afo schnorre. Womer das erschte Mol passiert esch, beni recht verschrocke, well ich hans voll ned erwartet. Han gmeint gha, de Sack segi en Abfallchöbel. Doch jetzt beni amigs of alli Öberraschige gfasst.

Han höt während em Zmorge weder mol Bsuech vo mim Frönd Eichhörnli gha. De esch zmol ofem Fenstersims omeghöpft ond hed amene Nössli omegnaaged. Also wenns Fenster offe gsi wäri ond keis Moggenetz hetti, ich glaube de Cheib wäri inecho ond het mer mini pancakes klaued.

Klischee #1: Kanadier sind naturverbunden.
Stimmt definitiv ned. Es Bispel: Grondsätzlich werd in Toronto bis am 31. Mai gheizt, abem 1. Juni werd Klimalag agloh ond küehlt. Met folgendem Resultat: Im Momänt esch es i oisem fensterlose Büro 27.2°C warm. I'm Sommer sellis denn aber amigs so chalt si, dass mer en Pulli alegge muess.

Klische #2: Kanadier sind gebildet
Han hot chli Abwechslig vom Büroalltag bi HelpCaster brucht ond ben drom trotzdem dass es nonig Wochenendi esch in Usgang. Welli zom Heigoh aber glich ned di ganzi Taxifahrt han welle zahle, hani en Gfährte gsuecht, wo i di gliich Rechtig muess om Taxichoste z'teile. Ond met dem hani denn es wahnsinnigs interessants Gspröch gha: "Where are you from?" "I'm from Switzerland" "Wow ... Switzerland ... so ... you are Scandinavian as well?" "No, I'm not! I'm from Switzerland not Sweden!" "Yeah yeah, Scandinavian, I know, I'm also Scandinavian ... I'm from Denmark" "Haha ... you're kidding ... Denmark is not Scandinavian." "Of course it is, I bet 1 million" "So do I, Denmark is south of the North Sea therefore it's not a part of Scandinavia". Cab driver: "Sweden, Norway and Finland, that's Scandinavia, nothing else" Ich: "I give you a good advice buddy. Buy a map of Europe and learn the countries." "I'm know it. I'm half Irish, half Danish and I'm from Canada. You know, originally every Canadian is from Europe." Tja, ich glaube mer müend oisi Grenze neu zeichne!!

Ich han beschlosse, en Englischkors z'mache damit au öppis vode Sproch hange bliibt, well ich han ned s'Gfüühl, dass ich im Gschäft wahnsinnig vel lehre. Softwareentwickler esch halt wohrschendli ned so de kommunikativsti Job. Be vo mim supervisor druf hiigwese worde, dass ich Selbstgspröch füehre (resp. ben of Dütsch am omeflueche gsi). Aber er hed gmeint, das segi ganz normal, das fächi met de Ziit so a.
Jo jedefalls han ich mich för en Abigkors am George Brown College agmolde ond han höt as placement interview müesse, wo de Lehrer eim nacheme Gspröch in richtige Kors iiwiist. Ond d'Lehrerinne händ also voll em Klischee vomene English teacher entsproche. Chum chonnt mer is Schuelzimmer ine, werd mer grad mol imene barsche Ton empfange: "Write your name on the blackboard and have a seat!!" Do weiss mer grad, wo dore de Wind pfiifft.

Öber de Mittag hani es längers Gspröch met em Ramin (Arbetskolleg) öber de Iran gha. Sitt zwoi Woche esch de Ramin Kanadier. A dem Tag woner sis Citizenship becho hed, hed er för alli Schoggichueche mitbrocht. Wohrschendli esch de Ramin kein typische Iraner, well er haltet öberhaupt nüt vode jetzige Regierig ond vom Islam öppe glich vel, wie mer vo oisere Chile. Aber esch glich no interessant, was er so verzellt. Die iranischi Bevölkerig esch teilwiis gar ned so islamistisch, wie mer ois das vorstelled. Vel Sache send zwor offiziell ned erlaubt, werdet aber glich vo jedem gmacht. Bispellswiis esch Satellitefernseh verbote, aber dennoch hed fascht jede en Schössle ofem Dach ond cha CNN, BBC etc. luege. Di meischte verstönd eifach nüt, wells kei Englisch chönnd. De Regierig gächis au gar ned bsonders oms Politische, i dere Hinsicht segi si gar ned so restriktiv. Vel meh kämpfeds us religiöser ond moralischer Motiviation gäge de westlichi Sittezerfall à la Sex, Drugs and Rock'n'Roll. So sind z.B. westlichi Musig ond MTV total verpönt ond verbote.

Ond wössed ehr wieso im Islam Polygamie erlaubt esch? Vor es paar hondert Johr esch de Islam im Chrieg gsi. Dur das heds zwenig Männer ond zvel Fraue gha. Om d'Reproduktion stabil z'halte, esch denn Regle igfüehrt worde, dass jede Maa mehreri Fraue ha dörf. Tja ... so esch denn die Regle halt nie abgschafft worde ond bestoht drom no höt.

Öppe 50m vo minere Wohnig entfernt esch e Fabrik vo Canada Bread. Das esch de grössti Toastbrot-Produzent in Kanada. Dementsprechend schmöckts au immer noch frischbachenem Brot, sobald ich usde Huustöre chome. Ond das fendi ich langsam zemli gemein. Well guets Brot chonnt mer do nieneds öber. Toast hani langsam satt ond wenn frisches Brot wotsch chaufe, denn bechonnsch sones Wiisbrot-Baguette wo wie nes 3 Täg alts Frischbach-Weggli schmöckt. Jedes Hiestand Brötli usem Tankstelleshop ide Schwiiz esch besser. Hed wörkli weder mol gern chli feins Brot oder Zopf!

Sweet'n'Sour segi luut guet onterrichtete Quelle gar keis typisch chinesisches Grecht ond nor en verwestlichte Abklatsch vode chinesische Chochi. Also han ich mich gester in China-Town fachmännisch (oder besser fachfrauisch) berote loh. So riesig begeistered beni jedoch ned gsi, so Gädder-Fleisch. Chinesische Männer hegged das gern, segi guet för ehri Männlichkeit. Naja ... mer bereitets en Tag spöter amol nor Problem ide Verdauig. Nöchscht mol nemi lieber Sweet'n'Sour. Deför beni voll Fan vom Bubble Tea worde :-)

Of das abe ben ich mit vier Girls in Usgang. Well Gwen letscht Woche Gebortstag gha hed, händ zwoi Kolleginne vo ehre us Montreal ond eini us Toronto Wochenendi mit ehre verbrocht, ond ich ben au in Usgang iglade worde. Ond han kein Rappe müesse usgeh, esch mer alles zahlt worde. Ben mer chli vorchoh, wie imene falsche Film. Obwohl die alli Studentinne send, esch för sie s'Verhältnis zwösche "Schein und Sein" chli anderst glagered als mini Uffassig. Naja ... egal ... ich hans jedefalls no loschtig gfonde. Ben also au vollkomme in alli Fraue- ond Beziehigsproblem involviert worde. Ich glaube, noch Toronto schriib ich e Buech öbers wiibliche Gschlecht .... pfffft.

Am Sonntig ben ich is Distillery District gange. Das esch en ehemalige Whiskey Brauerei wo jetzt als Ruum för Ateliers ond Läde gnotzt werd. S'Ganze Gländ gseht chli us wie usem letschte Johrhondert ond wird drum au oft als Kulisse för Hollywood-Film verwendet. Es hed det verschedenstes Konsthandwerk (Hutmacherinnen, Galerien, Fotografen, Boutique für Hundekleider, Glasbläserei, Schreiner, Goldschmiede uvm.)


Im spötere Nomittag beni no is MOCCA (Museum of Contemporary Canadian Modern Art) gone Fotiustellig aluge. Hed det Fotene us de Sperrzone Rond om Tschernobyl gha. No iidtröcklichi Bilder. Mer gseht Szene us Schuelhüüser ond Chindergärte. Puppe ond Spelsache leged no ome, wie wenns grad no bruucht worde wäred.

So machts grad i mine Ohre ... hanen Tinitus, well be ame Konzert gsi OND ES ESCH SAULUUT GSI. Aber deför beni au voll abgange. Ond ich han ned emol Itrett müesse zahle (chan mers ned erchläre, aber ich ben glaubs us Versehe ade Kasse verbii gloffe). Gspellt händ drüü Bands, onder anderem Russian Futurists. Die send glaubs sogar us Toronto oder Omgebig, aber no relativ bekannt (ich han sie jedefalls scho vorher kennt). Aber komisch fend ich do, dass Kanadier nie es "Zugabe" verlanged. Wenn Band ehre letschti Song aseit, gits au keis grosses Gschrei ond wenns fertig esch, denn werd chli us Aastand klatsched ond nochher laufeds scho devo, ohni öberhaupt no meh zfordere. Das esch mer jetzt scho paar mol ufgfalle ... komisch!

Mmmmmh .... be grad am Ginger Guetzli knabbere ... di beschte!

Also en Hippie beni nonig worde (obwohls do es paar vo dene git) ... aber wenn ich do in Kanada verzelle, dass jede Schwiizer en Waffe ond Munition diheime hed, denn stosst das meistens of völligs Onverständnis. Ersti Frog: Du au? Zwoiti Frog: Gits denn ned unglaublich vel Tötigsdelikt? Ond of di zwoiti Frog hett ich vor es paar Tag vellecht no met "Nei" gantwortet. Scho chli komisch, dass es kei offizielli Statistik öber de Gebruch vo Dienstwaffe im Privatbereich git?!? Ond ehrlich gseit esch es wörkli völlig absurd ond paranoid. För Autos ond vellecht bald au mol Hönd muess mer e Prüefig ablegge, ned aber för Waffe ... nei, mer wird sogar dezue zwonge. Ich glaubs ossert em Ulrich Schlüer esch niemert of sini Waffe im Estrich stolz ... ond wenns politisch scho ned dorchsetzbar esch, denn selleds sies doch freiwillig mache, ich gebe sie gern ab!

Das esch nüt zom esse, nei, das esch es Internationals Dokumentarfilmfestival (http://www.hotdocs.ca) wo zor Ziit in T.O. im Gang esch ond ich gone det höt Obig en Film go luege. Han im Programm gseh, dass es sogar es paar schwiizer Dokfilm git ... eine wördi zwor au höt Obig laufe, jedoch erst am 23:45 ... chli spot ... well morn muess i doch weder go schaffe :-(

Ehrlich gseit esch höt en ganz normale Arbetstag gsi ond ich ha nüt spannends erläbt. Drom verzell ich halt mol weder chli öber Gwen.

Eigentlich han ich immer gmeint, Singapur segi es fortschrittlichs ond freis Land, doch Gwen hed min Iidrock korrigiert:

• Medie (Ziitige, Fernseh, Internet) sind staatlich kontrolliert ond zensuriert. Satelliteempfänger send verbote, well Zensur damit omgange werde chönnti. Westlichi Ziitige sind nor sehr iigschrenkt zuegäglich (Bsp: Cosmopolitan oder Wallstreet Journal erst sett 2003 erlaubt).
• Of Drogebsitz gits Todesstrof
• Kei real existierendi Oppositon. Präsident sett 3 Generatione us de gliiche Familie
• Wer es Auto wott chaufe, muess vode Regierig en Lizenz ersteigere
• Regierig bestimmt, welli ethnischi Groppe i welli Wohnig doerf. Ethnischi Zämesetzig imene Gebäude muess Zämesetzig vode Gsellschaft representiere.
• Homosexualität ond Oralsex sind illegal

Ond ich glaube gnau us dene Grönd esch Gwen a all dem furchtbar interessiert. Sie lueged in ihrere Freiziit voll begeistered MTV, esch wahnsinnig interessiert a allem wo met Droge z'tue hed ond lest di ganzi Ziit ergendwelchi Literatur öber Schwuli, Lesbe oder soschtigi erotischi Romanze. Ond om sich vomene gliichgschaltete durchschnittliche Singapur-Börger abzgrenze, muess sie anduurend ehri Individualität betone. Mängsmol ganz amusänt ... mängmol sehr läschtig ond peinlich. Ehre Blog (http://wandergwen.blogspot.com) esch es guets Abbild vo ihrere Persönlichkeit (uuups....mine hoffentli ned) ond zaehlt definitiv zom amüsante Part ... d'Hälfti wegloh ond denn esch mer denn öppe bide Wohrheit.

Zom Glöck chom ich useme andere Staat!

P.S: Ich han weder warm Wasser ... yes!!

Höt Obig lüüteds ade Töre, sonen Servicemaa ime blaue Overall ond ere Rohrzange ide Hand stoht vorem Huus ond schisst mich zäme. Wenn er ned is Huus ine chönni, denn heged mer halt au kei Gas. Jawohl, kei Gas hämmer, well de Ricky Gasrechnig ned zahlt hed. Ond zom Gas weder astelle muess de gueti Maa natürlich in Chäller abe chönne, Ricky aber mol weder ned dihei, ofem Handy natürlich ned erreichbar ... halt e rechtigi Schofsbirre.

Jawohl, drom werd ich au morn weder en chalti Duschi chönne gnüsse, aber ich han mer gschwore, dass esch di letschti!! Während ehr de Moritz während de Asproch vom Rednerpolt verschüüched, randaliered ond de Böög chlaued starte ich mini eigeni Warmwasserrevolution.


Zwar erst mit sehr moderate Wort, doch ich kämpfe för mini Recht!
Ricky's Door, May 1st 2006, 8:30pm