Ben am Cat Empire (www.thecatempire.com) Konzert gsi, ich cha nor säge: "wicked, that was rocket". Es esch eifach hammergeil gsi. Vo de erste Minute her voll power, Band hed grad alli i ehre Bann zoge. Eis vode beschte Konzert woni jeh gsi be.

Morn esch Canada Day (analog 1. August) ond mer händ drom am Mäntig frei. Das verlängerte Wochenendi wotti drom chli sinnvoll nötze ond han chorzfristig en Last-Minute-Trip noch Chicago bueched. Morn Morge gohts los, drom evtl. au weder chli Fonkstelli im Blog.

Cheers!

Höt Morge ade Tramhaltestell gfötelet: Scheidig för 300 Dollar. Schiint no recht bellig z'sii. Vellecht wird ide Schwiiz jo glii mol Scheidig bi M-Budget ond Prix Garantie zom tüüfe Priis aabote. Deför hani höt för es Kilo Öpfel, es paar Zwetschge ond Tomate 12 Dollar zahlt. Esch halt doch ned alles so bellig.

Schwein hani höt gha. Im Badzimmer esch plötzlich de Schrank vode Wand abegheit, wo de Dave Schranktöre zue gmacht hed. Au ned verwonderlich, wenn mer gseht, wie "guet" das agschruubed gsi esch. Jedefalls esch de Schrank denn of de Tumbler abgheit ond ofem Tumbler han ich mini Brölle heregleit gha. Komischerwiis esch mini Brölle noch dem Onglock ondert em Tumbler gläge. Kei Ahnig, wie sie det here cho esch, aber glöcklicherwiis no ganz, im Gegesatz zom Schrank.

  
Das Wochenendi esch in Toronto Pride Parade gsi. Das esch en Schwule ond Lesbe Parade. Ned vel anderst als Streetparade. Chli schrägi ond vel Lüüt, aber onderhaltsam esch es allemal gsi.

Tja ... alles goht halt Mol verbii, so au oisi Ferie. De Triibsand i mim Zimmer hämmer müesse ufruume ond packe. Nocheme chorze Abstecher id Stadt semmer denn of de Flughafe ond ich han d'Natalie weder müesse verabschede. Ond natürlich hämmer ide U-Bahn zom Flughafe fangs gmerkt, dass ei Täsche fehlt ond no im mim Zimmer stoht. Öppis muess jo immer schief go :-)

Jetzt hani de ganzi Obig met uufruume ond Blog-Iiträg schriibe verbrocht. Ich hoffe, es lests wenigstens au öppert! :-)

Bes glii ... Ciao!

De Friitig esch au so cheibe schnell verbii gange. Weiss gar nömme recht was mer gmacht händ.

Jedefalls am Obig semmer nomol in CN Tower go Znacht esse, wells ois s'letschte Mol det so guet gfalle hed. Ond das Mol hämmer sogar en Platz direkt am Fenster becho. Esch eifach Hammer, wemmer bi Blick öber di ganzi Stadt met ehrne tuusige vo Lichter öppis feins häberle cha!

Weder zrogg in Toronto hämmer mol weder rechtig müesse uusschlofe ond ois vode Reise-Strapaze erhole. Ond de Natalie hani no alli Sache welle zeige, wonnere nonig zeiged ha (was aber onmöglich gsi esch, Ziit goht eifach immer sooo schnell verbii). In China-Town go Zmittag esse, im Honest Ed's go Krimskrams aluege, Chleider probiere, Schueh aluege ... en ermüedendi Sach!



Oise Ford Focus hämmer au weder müesse zroggbrenge. Ond z'Toronto of de Flughafe cho esch en müehsami Sach ... vel zwiit weg, vel zvell Stau ond denn semmer im Parkhuus no as falsche Ort. Ben denn halt eifach ide Einbahn idi anderi Rechtig gfahre, welli kei Loscht gha han, weder usem Parkhuus use ond om de ganzi Flughafe zfahre, zom weder is Parkhuus z'cho. Halt so rechtig eine uf Tourist-met-Mietauto-wo-ned-druus-chonnt-wo-dore-fahre gmacht. Händ anderi halt chli ghuuped ... aber mer schneller zom Ziel cho ... hihiiii.

Inzwösche hämmer gmerkt, dass mer en Tag z'vell för Heifahrt igrechned gha händ ond händ drom no an Abstecher noch Kingston (120'000 Iwohner, chonnt eim aber chliiner vor als Bade) gmacht. Das esch en chliineri Stadt am Ontario-See wo aber eigentlich no herzig esch. Vo det semmer anere Öberland-Stross am Ontario-See entlang gfahre. Das hed sich definitiv gloht, es sehr e schöni Gägend. Met de Fähre send mer denn no of Prince Edward County, en grösseri Insle im Ontario See, wo ned so wahnsinnig touristisch ond drom no schön esch. Det hämmer ime Nationalpark met Beach ond Sanddüne (im Prospekt esch gstande, sie seged 2 Stockwerk hoch, doch das stimmt definitiv ned!) oise Grill uspackt ond es wiiters Nachtesse koched. Oise Grill esch eifach de Bescht! Ond de Sonneondergang am Beach zwor chli kitschtig, aber gliich schön gsi. De Ontario-See esch soo gross ond de Beach au no zemli, do hed mer wörkli s'Gfüühl, mer segi am Meer.

  

Nochem Iidonkle hämmer denn no di letschte paar hondert Kilometer bes of Toronto zrogg gleit ond Znacht am 02:00 öppe en Stond lang en offizielle ond öffentliche Parkplatz gsuecht, om ned scho weder en Parkbuess z'becho.

Wells Mittlerwiile au scho Dienstag gsi esch, hämmer s'Gfüühl gha, mer müessed ois langsam of de Röckweg of Toronto mache. Ergendwie hämmer ois do debi aber om ein Tag verrechet ... super blöd gsi, hätted nämli locker no ein Tag länger chönne verpläperle. Jedefalls semmer gäge de Obig rechtig Weste ufbroche ond bes tüüf id Nacht ine Auto gfahre ... Raststäte aghalte, Tim Hortons Kaffi tronke, wiitergfahre ... Raststätte aghallte, Benzin tanked ... brrr ... chan mer ned vorstelle, wie die Lastwage-Chauffeure das ushalted, wenns dor ganz Kanda müend fahre. Kaffi esch meistens chotzgruusig. Die lönd en eifach ide Channe för Stonde for sich hii choche. Esch zwor cheibe heiss, aber eifach kein rechtig frösche Kaffi-Gschmack ond keis Schüümli. Immerhin hämmer ois gweigered, au no ime Fastfood Restaurant z'esse. Also hämmer vorem Burger King oise Grill uspackt, Pasta koched, ich han met altem Toast-Brot ofem Parkplatz Möwe gfüettered ond Pfanne ofem WC vome andere Tim Hortons (Kaffichetti wos öberall, aber au wörkli öberall git) abgwäsche. Ergend einisch semmer so müed gsi, dass mer imene Hotel am Highway aghalte ond öbernachted händ.

Nocheme Toast uf oisem super Grill semmer wiitergfahre in Rechtig Québec. Ond die Stadt esch wörkli es Bijou. Total anderst als die andere kanadische Städt. Eigentlich meh europäisch, met ere grosse Altstadt met Stadtmuur, schöne alte Gebäude ond ehre Borg. Do gits chli weniger Fastfood, deför endlich mol guets Brot us de Boulangerie ond de beschti Crepes! Mer händ vell zvell gässe i dere Stadt ... fascht chönne omechogele.

S'Bed and Breakfast "Le petite prince" wird vomene Trio gführt. De Robert (Bau-Maa wo alles baut), de Jospehine (was di macht, hämmer ned usegfonde) ond em Johnny (Klischee-Schwule ond Designer wo alles im Hotel entwirft). De Robert hed ois denn de Johnny vorgstellt, wo es sehr exklusivs Zmorge gmacht hed. Natalie hed denn zerscht gmeint gha, de Hond vom Bed and Breakfast heissi Johnny, doch das Missverständnis hed de Johnny denn met es paar graziöse Bewegige ond eme schöne Augeufschlag schnell klärt gha.

A dem Wochenendi heds in Montréal denn en riesige Markt gha met tuusige vo Ständ ond no vell meh Lüt. Aber es esch eifach veeeell z'heiss ond d'schwüül gsi. Mer send ide Stadt omekroche wie zwoi halblebigi Flüügene. Imene Hutlade händ mer ois denn beidi met zwoi Chapeaus usgrösted.

Well Montréal ois ned de allersympathischti Iidrock hinderloh hed, händ mer beschlosse, noch Québec wiiterzfahre. Öbernachted händ mer ofeme Zeltplatz am Highway of Québec. Ond das esch so en rechtig schreckliche Camper-Zeltplatz gsi. Huusgrossi Wohnwäge werdet met Plattforme ond Holzverschalige verbout. Ond jede hed en Gartehaag om sini Wohnwage-Parzelle ond Fahnestange ofem Grondstöck zom sini Präsenz markiere. Kei Ahnig, wieso mer denn no go campe goht. Ond am Morge am 8i werdet Rasemäher ond Heckeschniider föregno ond vorem Wohnwage werd alles abgstaubt. Mer händ fascht Schüüb öbercho. Ond es netts Gspöndli im Gebüsch nebem Zelt hämmer au gha: En Ente wo die ganzi(!) Nacht dore im 5-Sekunde-Takt Quack .... quack ... quack ... quack gmacht hed. Am liebschte hetted mer sie of de Grill grüehrt.



Zom Znacht choche händ mer no es paar Lebesmittel brucht. Zeltplatzfrau hed gmeint, de Lade segi ganz ide nöchi, im nöchste Dorf, nomme öppe 7km entfernt. Jawohl ... för schwiizerischi Verhältnis sehr nöch. Devör händs det im Lade riesigi Zwebele gha ... rechtigi Atom-Zwebele. Natalie heds soooo Froid a dem riese Zwebeli gha, dass sie ganz vel devo gässe hed. Mini Froid esch chli begrenzter gsi. Aber schliesslich hed sie jo Gebortstag gha ;-)

Nocheme Zmorge imene Tea House met vele feine Teeli, Chrüterli ond guetem Kaffi han ich denn de Natalie no sochli im Schnelldorchgang zeiged, was ich vo Ottawa so alles z'gseh becho han: Parlament, Nationalbank, Japanischi Botschaft, Koreanischi Botschaft, Saudi-Arabischi Botschaft, Kuwaitischi Botschaft, Französischi Botschaft .... ond natürlich s'Wohnhuus vom Schwiizer Botschafter. Ide Wort vode Natalie: "En sehr en politische Rondgang!"

Am spötere Nomittag händ mer ois of de Weg of Montréal gmacht ond send det grad mol voll ofeme Abzockerparkplatz glandet. För 1.5h parkiere hämmer $12 müesse zahle. Ond Englisch händs au ned recht chönne. Do han ichs denn halt Mol met Französisch versuecht ond de Schoss esch voll hende use gange. Natalie hed sich nebedra krömmt vor Lache. Mer chömmed eifach immer di englische Begriff in Sinn, get denn sone Meschig us englische Wörter met französischem Akzent usgsproche. Ond ich vergesse immer, dass es im Französische au no en Höflichkeitsform get. Hani halt immer allne chli Du gseit.

Well in Montréal sones Festival gsi esch, send Hostels ond Jugis alli usbueched gsi. Also hemmer denn beschlosse, chli en tüüreri Onderkonft z'sueche. Ond glandet semmer denn imene mega schöne Bed and Breakfast, im "Le petit prince" (http://www.montrealbandb.com). Mer händ en ganzi doregstylti Wohnig met Whirlpool för ois allei gha. Esch zwor au ned ganz bellig gsi, aber mer händ ois das gönnt ... schliesslich hed Natalie am nöchste Tag jo au Gebortstag gha.

Wells schochli spot gsi esch (gäge Mitternacht) ond oisi Mäge knorred händ, hämmer ois es Taxi gschnapped ond zomene Viertel met vel Restaurant chauffiere loh. Ond Taxi-Fahrte in Montréal gönd voll ab. Do werd gflueched, ghuuped, Korve gschnette, inedrockt ond of de Gägefahrbahn ade Kolonne verbiigfahre. Nochem 12i händ mer de Natalie ehre Gebori welle fiire ond grad mol en pitcher Sangria bschtellt. Weiss au ned, wie mer of sone Idee chan cho. Erstens hani Sangria gar ned so gern ond de Buuch esch vom Esse sooo volle gsi.

Am Morge hämmer grad mol alli andere Camper gweckt. Alarmalag vom Auto esch losgange wo Natalie chli fest am Kofferruum gschöttled hed. Ond ich han de Schlössel zom Alarm abstelle im Hosesack gha ond ned tschegged, wasi muess mache, welli am Lache gsi be.

Go paddle hämmer nömme möge, för das semmer chli z'müed gsi. Also hämmer ois of de wiiteri Weg gmacht. Mer händ denn ois relativ spontan entschlosse, no en Nacht in Ottawa izlegge ond send so ines rechtigs Backpacker's gange. Met es paar Schnapps-trinkende Amis ond enere Öko-Veggie-Frau wo öppe 3kg Rüebli koched hed. En feini Fläsche Wii ond d'Rrrrüebli-Frau hed ois denn inspiriert, alles chli Wörter met R z's&aouml;ge. Leider hämmers ned ufgschrebe, aber das wäri en langi Blog-Iitrag worde. Gschlofe hämmer imene sogennante "semi private room". Eigentlich ned meh als en Masseschlog, nor heds om s'Bett ome no en Vorhang. So vell zo "semi private". Mer hed also s'volle Vergnüege vo de andere Kamerädli.

Well mich die Moskitos immer of de Chopf gstoche händ, beni mer gonen Huet chaufe. Ich han mer denn sonen rechtige Crocodile Dundee Huet usgsuecht. Natalie hed en aber ned so toll gfonde ond mich immer als Tourist betitled :-(

Ond afo stinke hämmer au schomol. Well black flies Deos ond Shampoos liebed, sett mer ned dusche ond kei parfumierti Sache bruuche. Mmmmh ... en animalischi Sach!

Well mer in Amerika bim Poschte för öppe jedes zwoite Produkt en neue Plastiksack bechonnt, händ mer oises Puff im Kofferruum mol müesse organisiere. En Chochimaterial-Sack, en Zmorge-Sack, en Frischware-Sack, en Grillgas-Sack ond en Adventure-Sack. Voll d'Organisation hämmer gha!

Im Algonquin Nationalpark hämmer es Kanu gmietet ond send chli go paddle. Am Afang han ich de Natalie ned glaubt, dass vore paddle vel strenger esch als hende. Of de Retourfahrt hanis denn sälber müesse erfahre. Om so grösser esch eri Schadefroid gsi. Of de Kanufahrt hämmer denn no en Elch troffe. Han eigentlich dänkt, dass seged zemli schüchi Tier. No recht erstuunlich gsi, wie nöch mer händ chönne herepaddle ond sich de Elch bim Fresse ned störe loh hed.

  
Ofem Zeltplatz im Park heds nor so gwimmled vo so gmeine bösartige Stächi-Tier. Drom händ mer oisi superguete Moskito-Schotz-Netz usem Wal-Mart agleit. Do demet hämmer tip top es BBQ of oisem Grill chönne mache. Ond Natalie hed vom Ruedere sooo fescht Appetit gha, han sie glaubs no nie so hongrig gseh. Alli Essware ond Abfäll hämmer denn Bäre-secher versteckt ond ois ofs Ohr gleit. Nor de Chochimaterial-Sack hämmer vergässe. Ond de hed ois denn Znacht au zönftig verschreckt. Sonen Waschbär hed en cheibe Froid gha, met oisen Becher z'spelle, of de Plastikteller omezhacke ond ganze Säck uszpacke. Semmer recht verschrocke, wos plötzli näbem Zelt gscheppered ond klöpft hed. Znacht semmer denn no es paar Mol vo Wolfghüül gweckt worde. Mer ghört d'Wolf öber mehreri Kilometer metenand kommuniziere. Das han ich mega iidröcklich ond schön gfonde.

  

Nochträglich do oisi Erläbnis vode letschte 2 Woche. Halt chli vel zom Lese ... aber mer händ halt au vel erläbt!

Nochdem mer gester Obig scho en Parkbuess becho händ ond mer ned ganz secher gsi send, öb oise Parkplatz wörkli legal esch, ben ich met eme schlechte Gfüühl verwached. Gschnell es paar Hose agleit ond no völlig schloftronke zom Auto gschlurft ... ond prompt, scho weder es parking ticket. Parkiere am Strosserand esch doch ned sone gueti Idee. Ond zo allem Öbel esch au grad no en Cop ime Polizeiauto zfahre cho ond hed hender oisem Auto aghalte. Ich glaube, es wäri nömme lang gange ond oise car wäri abgschleppt gsi. Nochdem ich denn no oisi Stegge derabgflogge be ond met em Chopf ad Steggedecki täscht be, beni denn definitiv wach ond ready för oise roadtrip gsi.

Imene "regebogefarbige" Lokal hämmer es typisches English breakfast gno. Natalie esch stets met "sweety" agsproche ond d'Eier send vomene kichernde und gackernde Moskelprotz serviert worde. Aber Zmorge esch de Hammer gsi!

Mer send denn rechtig Norde gfahre. De Algonquin Nationalpark wäri eigentlich oises Ettapeziel gsi, wenn mer do ned weder bi somene Wal-Mart verbi cho wäred. Eifach es Shopping Paradies för Natalie ond de Andreas. Pfanne för $5, Flauschi Decki met Chössi för $7 ond hiking Schueh för $19!! Mer händ so lang poschted, dass mer oises Iichaufswägeli nömme gfonde händ. Wal-Mart Frau heds scho versorged gha, well mers z'lang omestoh loh händ.

Noch echli falsch fahre (im Chreis ome ... ah ... do fohre semmer doch go poschte gsi oder?) semmer denn ofeme Zeltplatz glandet ond händ oisi super Zeltusröstig grad Mol of Herz ond Niere tested. Ond ich ben schomol fascht doredrölled ab dene Moskitos ond black flies. Black flies händ mich hinder em Ohr so fescht besse, dass Bluet abegloffe esch. Das send rechtigi Dracula Fiecher!

Bim Znacht esse esch denn es wiiters Malheur passiert. Mer sett ebe ned ofeme Camping-Holztisch-met-Bank omekösse. Gwechtsverlagerig chli ongschickt gsi. Tisch ond Bank esch kipped ond alles öber ois ine gheit. Grill mer of de Chopf (weder Mol), Pfanne met Tomatesauce ond de Wii de Natalie öber d'Hose, doregnässt bes of d'Onderwösch. Oisi Chleider händ am nöchste Morge so rechtig noch Essig gstonke (Wii esch ebe ned de beschti gsi).

Montag, 12.06.2006
Am Mäntig semmer chli go shoppe gange, gnauer gseit in Wal-Mart. Ond det hämmer oise beschti Iichauf gmacht. E Loftmatraze för $14, es Zelt för $29 ond en Grill för $21.63. Ond mer säged oich, de Grill rockt. Händ en sogar scho igweiht. Send met de Yukari ond em David för es BBQ an Beach gange. Chli es schweriges Onderfange, es BBQ organisiere met dene zwoi, aber mer händs denn doch no gschafft :-)

  

Dienstag, 13.06.2006
Mer händ am Flughafe oises Mietauto in Empfang gno. Eigentlich hämmer nor en Kompaktwage erwartet, aber grad en Familie-Kombi becho. Autos send halt alli en Nommere grösser als bi ois. En nigelnagelneue Ford Focus, erst 18km ofem Tacho gha. Met dem semmer denn of Niagara gfäged. De Wasserfall esch schön, alles drom ome ... naja ... halt en amerikanischi Touriste City. Ond de Knöller esch denn oise Usflug id USA gsi. Zom de Wasserfall 30 Minute azluege, hämmer di ganzi Immigrations-Prozedur müesse öber ois ergoh loh, inkl. Fingerabdruck, Digitalfoto ond Ich-bin-kein-Terrorist-Fragespielen.

Joderno, morn gömmer los in Algonquin Nationalpark ... drom gits vellecht längeri Ziit kei Blog-Brecht vo ois. Let's go to the wilderness!

Hoi säme, I'm here! ... nei, so eifach esch es ned gsi, well zerscht hämmer ois ofem Flughafe verpasst. Hät soo vell Lüt gha, ben mer vorcho wie en Super-Star...:-)Han en nor gfonde, well er öppe de einzig gsi esch met eme knall rotä T-Shirt (mit Jesus-Aufdruck) :-)

Han scho s'volle Programm gha do! Weltreis bes zum Andreas sinere Wohnig à la Mister X, loschtigi chinesischi Läde hani scho gseh. Sbeschte esch denn aber wohl de Glass Floor gsi of em CN Tower obe... Händ alli Frauä so schwerig do zum of de Glasbodä ufezstoh und send of em Teppich stoh blebe. Gottseidank händ die ned gwösst, dass sich eigentli öberall Glas dronter befendet und das ganze nor en fiise Trick esch, demmet d'Lüt sich in Sicherheit fühled:-) De Andreas hät den no e chlini Show-Ilag botte of 351 Meter höchi... esch er eifach voll of d'Glassplatte ufegompet, hät mega klöpft und alli Lüt händ blöd glueget und eine hät en verdammte Lachafall becho :-)

Jojo, jetzt gömmer nochli go Toronto entdecke... Tschüss und weg

Natalie

Gester Obig send de Steve,Steve,André ond de Andreas (ich) weder as NXNE go es paar Konzert lose. Eis esch sones Synthesizer-Trash-Musig Konzert gsi. Musig eher schlächt, aber Show esch loschtig gsi. Sänger esch meh im Publikum am ometanze ond Konvetti omenandschüsse gsi, als of de Bühni gstande. Ond allne Zuschauer händs e Pirate-Augechlappe verteilt.

Ond denn esch do no die Band us Berlin gsi, King Khan And The Shrines (www.king-khan.com), die send live voll abgange! Bes Kanadier voll abgönd, bruchts einiges, send i dere Hiisicht eher chli reserviert. Ich säge oich, das esch en Hexechessel gsi. Hed sogar Zugabe geh, was sehr abnormal esch, aber das esch glaubs gsi, well Band us Dütschland cho esch.

Arribah ... han jetzt Ferie ond gange glii of de Flughafe go Natalie abhole ... trallallallalaa.

NXNE esch Abchoerzig för "North by Northeast" ond das esch gröschte Indie-Rock Festival in Kanada. I verschedene Lokal tretted das Wochenendi 400 Bands uf. Gester semmer go ne Japanische Girl Punk us Tokyo lose, fascht so wie die Band in Kill Bill ("Woo Hoo").

Ond s'löschtigste Ereignis vom Tag esch folgendermasse abgloffe: Im Englisch-Kors hämmer e Teamarbet gha ond ich han müesse ufschriibe. Do dezue han ich min Fülli zom Schriibe ond de Tinte-Killer zom Korrigiere brucht. Han scho gmerkt, dass mich alli ganz verwonderet aglueged händ, wo ich de Killer brucht ha. Bes denn d'Lehrerin cho esch ond mich gfroged hed, was das denn segi. Im Ernst, die känned do kei Pelikan Super-Pirat-Tintekiller ond send ganz erwstuunt gsi öber min Zauberstift.

De Chreis vode IAESTE Studis werd langsam grösser. Höt send en Griech ond en Finnländer dezue gstosse. Mer send in Mod's Club gones Konzert vo "Be your own pet" lose ond luege. Zom luege esch es no interessant gsi, Sängeri esch wie en Zombie omeghöpft. Zom lose chli s'weniger grosse Erläbnis, es esch sone rechtigi amerikanischi College Band gsi, sehr jong ... ond mer send ois sehr alt vorcho. Am Schloss esch Bühni vo es paar Teenies gstörmt worde, so dass Security igreffe hed ond Konzert meh oder weniger abrupt abbroche worde esch. Aber ich glaube ehrlich gseit, das esch im Konzept iikalkuliert gsi.

Oopps ... jetzt beni ipennt, während em 10vor10 luege ... News vo back home schiined ned so interessant z'sii. Deför hed mer de David höt alles öber kolumbanische Kaffi, Baumwolle ond em Gold Rush im El Dorado erchlärt.

Juhuii, nor no 3 Täg schaffe ond denn gits Ferie!

I oisere WG send alli vomene andere Kontinent ond choched drom au alli total anderst. Zuetate im Chüelschrank chönd eifach ond zemli gnau de Person zuegordnet werde. Au di eifachste kohlehydrat-riiche Schnellchoch-Menus onterscheidet sich vonenand:

Ich: Pasta
Yukari: Reis
David: Fladebrot met Mais

Das zieht sich denn dore bes zode Fettträger:

Ich: Oliveöl oder Butter
Yukari: Sojaöl
David: Erdnussöl oder Margarine

Am Fritig Obig händ mer IAESTE Studis beschlosse, am Sonntig ad Niagara Fäll z'fahre ond händ do dezue es Auto gmietet. Auto miete do in Kanada esch eigentlich no zemli bellig. Hed nor ein Hogge: Mer muess immer no Versicherig abschlüsse (resp. mer muess ned, aber es wird dringenst empfohle) ond die Versicherig chosted mängsmol meh als Automieti sälber.

Am Samstig heds voll gschöttet, drom hani ned gross veruse welle ond ben de ganzi Tag chli met de Schwiiz am omeskype gsi. Ben jetzt weder voll ofem neuste Stand, was back home so abgoht. Ich säge nor "Bahnhofbuffet Olte" ;-)
Am Samstig Obig send mer IAESTE Studis denn in Usgang. Imene Pub heds denn met so Englische Gentlemen Trinkregle agfange. Je noch Ziit muess mer Bierglas met ere andere Hand heb, Flueche esch strengstens verbote ond mer dörf nie met em Finger of öppert zeige. Esch sauglatt gsi. Weniger loschtig esch denn di aschlüssendi Clubbing Tour gsi. Send i somene 08:15 Club met $10 Itrett ond schlächter Musig glandet. Einzige Highlight esch gsi, das am Engländer (wem au sost?) Bierfläsche abegheit ond kaputtgange esch. 10 Sekonde spöter stoht en Security näbe mer ond macht mich chli onfröndlich a. Nochdem ich ihm denn han chönne klarmache, dass es ned mini Fläsche gsi esch ond dass es paar Glasscherbe ofem Bode jo ned so schlimm seged, hed er de Onfallort grossrüümig abgsperrt ond alli Scherbe ufgruumed. Jaja ... safety hed do höchsti Priorität.

A propos safety ... gester hed Polizei imene Vorort vo Toronto 17 angeblichi Terroriste verhaftet. Sie händ 3 Tonne Ammoniumnitrat (Dünger wo als Sprengstoff missbrucht werde cha) ond Zündervorrichtige gha ond welle en Bombe baue. Zor Ziit werd öber s'mögliche Attentatsziel spekuliert. Gnennt worde esch de CN Tower, U-Bahn oder Gebäude vom kanadische Gheimdienst. Ehrlich gseit han ich mich bis jetzt gwonderet, wiesos ned meh Polizei ide U-Bahn hed, schliesslich esch s'kanadische Militär au in Afghanistan involviert. Vellecht änderet das jetzt jo bald?!?

Aber zrogg zo oisem Usgang vom Samstig. Es esch denn zemli spot worde, ond mer händ am Sonntig Morge am 8:15 abgmacht gha. Noch 3h Schlof beni denn ufgstande ond an abgmachte Treffponkt gange. 2 send scho gar ned erschene ond die andere beide (inkl. ich) händ au ned besser usgseh ... ond Wetter esch au ned so guet gsi (jaja ... mer händ au no en gueti Usred gfonde) ... Trip noch Niagara esch jetzt of onbestimmti Ziit verschobe worde.

Han höt zom erste Mol Chleider gwäsche i minere neue Wohnig. Ond plötzlich es komischs Grüüsch ghört, so wie wenn Wasser uslaufe wördi. Ond ich han mega müesse lache, woni de Grond för da Geplätscher gseh ha:
Wasser lauft vode Wäschmaschine dor es selberbaschtleds Abflussrohr direkt id Badwanne ine ond brucht denn de Badwanneabfluss. Badwanne dient also sozsäge als Uusglichsbecki. Esch no interessant zom beobachte, wie vel Wasser während em Schlüüdere so chonnt ond di verschedene Wasserfärbige noch eme jewiilige Wäschgang.